GITUOHANG gitulis una gipatay ang maestra pinaagi sa pagdunggab samtang nagmaneho sa iyang gisakyang motorsiklo didto sa Purok 5, Barangay Naboc, Monkayo, Davao de Oro.
Ang biktima nga si Maria Lee Ortelias Sibayan, 27, minyo, magtutudlo sa kindergarten sa Inambatan Elementary School ug molupyo sa Purok 5, Barangay Naboc, giluba sa wala mailhing responsable alas 6:30 sa gabii niadtong Biyernes, Pebrero 3, 2020.
Sa inisyal nga imbestigasyon, nasayran nga ang biktima padulong nga mopauli sa ilang balay apan pag-abot sa nahisgutang dapit, nahitabo ang pagpangluba sa wala mailhing suspek gamit ang mahait nga hinagiban.
Matud pa nga luyo sa samad dinunggaban nga naangkon, nakadagan pa ang biktima palayo ug nangayo'g tabang sa iyang uyoan ug gidala ngadto sa Davao de Oro Provincial Hospital sa lungsod sa Montevista apan gideklarang dead on arrival sa doktor.
Sa gihimong pakighinabi sa Superbalita Davao kang Police Staff Sergeant Aldrin Balaga sa Monkayo Municipal Police Station, gikanayon niini nga tulis ang nakita nilang motibo sa krimen sanglit nawala ang sling bag sa biktima apan nakit-an didto sa Barangay Mapaca sa lungsod sa Compostela.
"Didto na napunitan sa Barangay Mapaca sa lungsod sa Compostela ang sling bag sa victim ug gisurender ni sa nakakita didto sa Compostela PNP," tug-an ni Balaga.
Matud pa nga mga identification cards ug ATM cards na lang sa biktima ang nahabilin sulod sa sling bag dihang nakit-an kini.
Ang pamilya sa biktima wa masayod kung pila o kung duna bay nakuhang kuwarta ang tulisan nga mipatay sa maestra.
Namatay matud pa ang biktima gumikan sa samad dinunggaban sa likod nga bahin sa lawas nga milapos sa dughan.
Ang patay nga lawas sa biktima gihaya didto sa ilang panimalay, samtang ang kapulisan sa Monkayo padayon ang gihimong makuting imbestigasyon sa tinguha nga mailhan ug madakpan ang suspek.