HUMAN sa iyang pagduwa sa Cebu Schools Athletic Foundation Inc. (CESAFI), si Tricky Peromingan nagtinguha nga motiklop sa iyang college basketball pinaagi sa pagduwa sa UAAP sa Manila ubos sa kampo sa Adamson Soaring Falcons.
Wala moduwa si Peromingan sa University of San Jose Recoletos (USJ-R) Jaguars sa Cesafi sa miaging tuig aron makatutok siya sa iyang pagtungha.
Apan ning higayuna, andam nang buhion og balik ni Peromingan ang iyang basketball career ug tinguha niyang makakulit og pangalan ubos sa paggiya ni Falcons coach Franz Pumaren. Sulod na sab sa pipila ka mga semana nga nag-training si Peromingan kauban ang Falcons.
Alang kang Peromingan, katumanan sa iyang damgo ang pagduwa og balik sa UAAP bisa’g sulod lang sa usa ka tuig ug misaad siyang dili niya usikan kining maong oportunidad.
Dili na bag-o alang kang Peromingan ang UAAP gumikan kay nakaduwa na siya ning maong liga dihang naa pa lang siya sa high school.
Si Peromingan usa lang sa daghang mga magduduwa gikan sa Cesafi nga gipangkluha sa Falcons nga naglakip nila ni Joshua Yerro, Ivan Maata, Mike Macion ug kanhi juniors MVP Jed Colonia. (ESL)