WALA pa’y klaro kon kanus-a makabalik og duwa ang Sugboanong higante nga si JuneMar Fajardo human naangol ang tuo nga bitiis niini atol sa praktis sa San Miguel Beermen niadtong Pebrero 3, 2020.
“Fajardo suffered a complete fracture on his right tibia during team practice last February 3. He was immediately brought to a hospital, where assessment on the extent of his injury and initial treatment were made,” opisyal nga pamahayag sa San Miguel management nga napatik sa www.pba.ph.
Niadtong Pebrereo 4, ang lumad nga taga lungsod sa Pinamungajan, Cebu ug produkto sa University of Cebu (UC) Webmasters gipaubos sa operasyon.
Gilaumang molanat og dugay ang rehabilitasyon sa 5-time MVP sa Philippine Basketball Association (PBA).
Gumikan niining maong hitabo, hayan nabutang sa delikado ang tinguha sa Beermen nga makalangkat og unom ka sunodsunod nga titulo sa umaabot nga Philippine Cup.
“During this rehabilitation phase, the team regrets that he won’t be able to play for the San Miguel Beermen in the Philippine Cup,” dugang pamahayag sa Beermen.
Dili lang ang Beermen maoy naapektuhan niini, kon dili hasta ang kampanya sa Gilas Pilipinas.
Wala man tuod si Fajardo sa Gilas Pilipinas pool nga mokombati sa first window sa FIBA Asia Cup qualifiers apan nakaeskedyul na kining ilakip alang sa second window sa kompetisyon.
Ang first window ipahigayon sa ulahing bahin ning buwana samtang ang second window nakatakda karong Nobiyembre.
“June Mar, for his part, is also saddened that he may not be able to join any upcoming international competitions,” batbat sa San Miguel.
Sa pagpadaplin ni Fajardo, ang Beermen mosalig og maayo kang Mo Tautuaa aron motapak sa dakong haw-ang sa ilawom nga bahin.
Sa miaging season, si Fajardo nag-average og 18.7 puntos, 13 rebounds ug 1.5 block shots, mga numero nga lisod alang kang Tautuaa nga matapakan.
Hinuon aduna pa’y igong hinagiban ang Beermen aron makakombati og insakto sama na lang nila ni Chris Ross, Alex Cabagnot, Arwind Santos ug Marcio Lassiter.
“We (are) ready,” tweet ni Ross.
Inig sugod sa Philippine Cup karong Marso 1, ang Beermen mopakita dayon og aksyon batok sa Magnolia Ang Pambansang Kamao Hotshots sa Smart Araneta Coliseum. (ESL)