BAG-UHAY lang si Allan nga nagpuyo sa dakbayan sa Lapu-Lapu tipon sa iyang iyaan ug ig-agaw sa barangay Looc. Lumad siya nga taga Minglanilla apan nahisay-a sa Lapu-Lapu kay buot sa iyang inahang si Penie nga sa siyudad siya papadayuna pag-eskuyla sa hayskol aron makasulod dayon og trabaho sa mga kompaniya sa MEPZ. Tinguha man god ni Penie nga adunay makatimbang kaniya sa panginabuhi isip inahan apan dili asawa.
Sa unang mga adlaw ni Allan sa Lapu-Lapu hilumon pa kaayo ug manggiulawon ang bayungbayong kay wala pa man lagi makasinati sa mga tawo, ilabi na sa ilang mga silingan nga katalirungan niyag panuigon.
Apan sa pagpanglabay sa mga adlaw inanay nang nahanaw ang maong kinaiya ni Allan. Tabian na kaayo siya ug kanunayng manumbalay sa mga silingan. Hangtod nga nakabaton siyag mga barkada – mga barkada nga maisip nga maoy nagnudnod kaniya sa kaalautan. Dili hinuon maingon nga bugoy ug badlungon ang iyang mga higala kay miila ug mitahod man kini sa Ginuo. Pero kini sila ang naggalgal kaniya sa bisan asang lakaw aron maglingaw-lingaw.
Usa ka adlaw niana, gidani siya sa mga barkada nga mangaligo sa dagat. Busa nianang hapuna, dala ang ilang bawon ug ubang gikinahanglan nangadto ang lima ka mga barkada sa Rock Island Beach sa Marigondon. Nagpakyaw silag traysikol.
Ang Rock Island usa ka dako kaayong bato nga nahimutang taliwala sa dagat nga sama sa usa ka gamayng isla nga giugmad ug gihimong kaliguanan. Gikan sa lapyahan sa Marigondon, ang Rock Island aduna lay gilay-ong mga 50 metros busa mahimo rang baktason kon hunas. Apan kon taob, kinahanglan kang mosakay og sakayan.
Pag-abot sa beach nangabang dayon og cottage ang managbarkada ug human ipahiluna sa lamesa ang ilang bawon ug ubang butang, nagkiat lang sila pagpangaligo. Adunay diving board sa ngilit sa pangpang hinungdang nakahigayon sila pagdayb-dayb.
“Ikaw na sab, Lan. Wa pa ko kakita nimong midayb, da,” ni Junior pa nga nagtingsi.
“Bitaw, Lan, ikaw na say dive sa diving board,” dason ni Joel nga nagbitbit sa usa ka buok linung-ag saging kardaba.
“Kamo god,” sanong ni Allan dayong panukad.
Mitibugsok si Allan sa tin-aw nga tubig ug mitunga dayong langoy ug mibalik pagsaka sa ilang nahimutangan. Human matagbaw sa ilang gibuhat, namalik sila sa cottage ug nangaon. Unya isig bitbit ang grupo og tagsa ka botelyang serbesa ug dihang nakahurot nag tagurha ka botelya, nangaligo na usab sila. Hangtod miabot ang kilumkilom ug inanay nang nagmingaw ang beach kay namauli na man ang ubang nangaligo.
Apan nagpadayon ang kasadya ug kasaba sa managhigala. Nagpuli-puli gihapon sila pagdayb sa diving board nga gituyo pagmontar sa tag-iya sa beach.
“Mga Abay, tan-awa ko ninyo. Mo-dive ko nga mag-una gyud ang ulo, ha! Ang akong mga kamot akong hipuson,” ni Allan pa nga migawas na ang hambog.
Misuliyaw ang mga kauban ug hapit magkadungan pag-ingon: “Sige, Bay!”
Midayb si Allan nga nag-una ang ulo ug mao na lang ang katingala sa mga barkada kay dugay man siyang mitunga. Milabay una ang lima ka gutlo una molutaw ang lawas sa ilang higala. Apan nakugang sila ug gikuyawan kay nagkadugo man ang ulo ni Allan nga nawad-an og panimuot.
Gidali paghatod si Allan ngadto sa pribadong tambalanan sa Basak ug nasuta nga miliki ang iyang ulo nga napantok sa bato. Gipahiluna siya sa intensive care unit (ICU) human maatiman sa emergency room sa ospital. Apan nianang pagka kaadlawon sa sunod adlaw nabugtuan si Allan sa iyang kinabuhi. (Katapusan)