Barrita: Presidential immunity from suit

GISALINDOT sa Korte Suprema ang petisyon ni Senador Leila de Lima nga ipahunong ang mga verbal attacks ni Presidente Rodrigo Duterte batok kaniya. Ang hinungdan sa pagsalindot sa maong petisyon mao ang doktrina sa “presidiential immunity from suit.”

Ubos ning maong doktrina, di makiha ang presidente samtang naglingkod pa siya sa puwesto. Ang presidente, bise presidente ug mga constitutional officials, mga mahistrado sa Korte Suprema, mapalagput sa puwesto pinaagi lang sa impeachment.

Sa desisyon nga penetsahan og Oktubre 15, 2019, ang Korte Suprema nipatigbabaw sa doctrine of presidential immunity from suit sa pag-dismiss sa petition for a writ of habeas data nga gipasaka ni De Lima niadtong Nobiyembre 2016.

“The petition must be dismissed even without the President invoking the privilege of immunity from suit,” nagkanayon ang ruling sa Korte Suprema nga gisuwat ni kanhi Chief Justice Lucas Bersamin tulo ka adlaw sa wa pa siya moretiro sa katungdanan.

Ang doctrine of presidential immunity from suit atong gisunod gikan sa Korte Suprema sa Estados Unidos. Ang atong Korte Suprema nag-ingon nga nahimo na kining kabahin sa atong sistema bisan pa kon wa kini ibutang sa 1987 Constitution.

Sa boto nga 13-1 (usa ka mahistrado on leave), ang Korte Suprema niingon nga way qualifications ang presidential immunity kon personal o opisyal ba kini nga buhat sa pangulo. “Neither does immunity hinge on the nature of the suit. The lack of distinctions prevents us from making any distinctions,” matod sa Labaw’ng Hukmanan.

Gitumong ang presidential immunity aron di mabalda ang pangulo sa iyang mga buluhaton. Busa immune siya sa tanang kiha, magamay ug madako. Apan ang Korte Suprema niingon nga si Senador De Lima adunay mga legal remedies, apan unya na kon wa na sa katungdanan ang pangulo.

Si De Lima nasikop niadtong Pebrero 2017 sa kiha nga pakigkonsabo sa mga drug lords sa New Bilibid Prison pila ka buwan human niya ipasaka ang petisyon. Matod ni De Lima tinumo-tumo lang ang mga kiha batok kaniya human niya imbestigara ang giingong extrajudicial killings (EJKs) labot sa gubat kontra druga.

Matod pa sa Korte Suprema. “Senator De Lima asserts that for every right violated, there must be a remedy. No one can dispute the validity of her assertion. We agree with her but at the same time we must remind her that this ruling will not deny her any available remedy.”

Sa ingon, selyado na ang doctrine of presidential immunity from suit dinhi sa Pilipinas. Ang gustong mokiha sa pangulo kinahanglang maghuwat nga mahuman ang iyang tenure. Kay samtang maglingkod pa sa puwesto ang pangulo, di siya mahimong makiha bahin sa bisan unsa, magamay man o madako. (edbarrita@gmail.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph