PASIDAAN sa magpataka’g post sa inyong mga social networking site, ilabi na sa mga sensitibo nga butang, sama niini karong hulga sa panglawas nga 2019 novel coronavirus.
Ang kagamhanan sa dakbayan sa Talisay nagplano sa pagpasaka batok sa usa ka lalaki nga si Jewel Aviso, bisan nangayo nakini og pasaylo sa iyang gi-post nga ‘fake news’ sa iyang Facebook account, nga nimugna og kabalaka sa kadaghanan Martes sa buntag, Enero 4.
Apan matud ni Talisay City Mayor Gerald Anthony Gullas, Jr. nga gipangitaan nila kon aduna bay mahimo silang legal nga lakang.
Alang sa mayor kini aron makat-on ug magmatngon ang tanan, ug mahimo nga responsible diha sa paggamit sa social networking site.
Sa FB post ni Aviso nipahibawo kini sa Talisaynon nga daghan na ang mga tawo nga giatiman sa Talisay City District Hospital (TCDH) gumikan sa pagkapositibo niini sa 2019 novel coronavirus (2019 n-CoV).
Ug nisaysay pa nga aduna nay nangamatay sa maong ospital.
Mao kini hinungdan nga nakamugna kini og panic sa ubang Talisaynon ug nakakuha sa atensyon sa TCDH ug sa City Hall.
Gumikan niini wa maglangan si Gullas iyang gimandoan ang kapulisan ug si Alvin Santillana, pangu sa City Disaster Risk Reduction and Management Office (CDRRMO) nga kuhaon ang address ni Aviso.
Nahibaw-an nga si Aviso sakop ni Santillana apan ni-absent without leave (Awol) sukad Enero 2020.
Si Aviso nangayo og pasaylo ug nisaad nga mohimo og post sa pagpangayo og despensa sa iyang nahimo.
“To all Talisaynons nga nabalaka sa akung post ganina, mangayo lang ko’g pasaylo ninyo kai na bag-ohan lang ko sa akung nakita ganina nga nag-prepare ang Talisay district hospital ganina para sa Corona Virus. Wala koi intention nga ma panic ang mga tao sa akung gi post kaganiha kai gusto lang ko maka tabang, pero sayop man diay ang information. Usbon ko nga mangayo jd kog pasaylo ninyo tanan nga naka cause kog panic,” tipik sa post ni Aviso sa pagpangayo og pasaylo.
“I also urged the public to avoid causing unnecessary hysteria by posting unfounded information on social media. If in doubt, you can always approach our health officials or read the latest updates from DOH,” ang post usab ni Gullas sa iyang Facebook page isip tubag sa post ni Aviso sa pagpangayo na niini og pasaylo. (FMD)