IKATULO nga kompirmado nga nataptan sa 2019 novel coronavirus Acute Respiratory Disease (2019-nCoV ARD) niabot sa Sugbo niadtong Enero 20, 2020 agi sa tugpahanan sa Mactan ug nilahos dayon ngadto sa lalawigan sa Bohol.

Ang biktima usa ka 60 anyos babayeng Chinese national, kinsa kuyog sa lain pang upat ka Chinese national gikan sa Wuhan City, China.

Sila niabot sa Sugbo sakay sa abyon nga gikan sa Hongkong.

Gipasabot sa Department of Health, nga gikan sa Mactan Cebu International Airport, nibyahe sila padung sa Pier 1 sa Dakbayan sa Sugbo diin sila ningsakay og fastcraft padung sa lalawigan sa Bohol.

Matod ni Department of Health (DOH) 7 Regional Dr. Jaime Bernadas atol sa press briefing sa Miyerkules sa hapon, Pebrero 5, nga usa pa sa ilang gi-trace karon kon unsay gisakyan sa mga Chinese national gikan sa MCIA padung sa pier.

Ang lima niadto sa Bohol alang sa turismo kun paglaag.

Niadtong Enero 22, gidala ang 60 anyos sa usa ka pribado nga tambalanan sa Bohol human nakasinati og hilanat ug sip-on.



Sa Enero 23 sa hapon, una kining gikuhaan og swab sample ug gipadala sa Research Institute for Tropical Medicine (RITM). Laing swab sample gipadala sa pagka Enero 24.

Gipasabot ni Bernadas nga kay nag-abot ang duha ka mga swab sample sa RITM ug niadtong higayuna wa pa kini kapasidad nga mohimo og test kalabot sa coronavirus, ang labing uwahing swab sample ang gipadala sa Victorian Infectious Diseases Reference Laboratory in Australia.

Ang gikuha sa pagka-Enero 24 nag-negatibo sa nCoV ug nigawas ang resulta sa Enero 29. Laing sample pa kun ikatulo nga test nga gihimo, negatibo gihapon ang resulta niadtong Enero 30.

Kay wa na nagpakita og sintomas sa sakit ang 60-anyos, gi-discharge kini niadtong Enero 31, ug nilarga na usab dayon uban sa upat ka kaubanan balik sa China.

Kay niadtong Enero 31 lang na-capacitate ang RITM dinhi sa Pilipinas pag-test sa samples, matud ni Bernadas nga tanang samples nga anaa sa ilang buhatan gipaubos sa test.

Apil na ang unang swab sample sa 60 anyos. Pebrero 3 nasuta nga nagpositibo kini. Apan matod ni Bernadas nga waay angay kabalak-an kay kon nag-negatibo sa ikaduha ug ikatulo, pasabot niini wa na kaniya ang virus.

Ang gihimo nalang sa kagamhanan karon ang pag-trace sa mga gikauban, nakatupad sa mga flight nga gisakyan pagpadung dinhi sa Sugbo, padung sa pier, diha mismo sa pier, sa fastcraft, sa pantalan sa Bohol, sa hotel nga gipuy-an ug sa mga lugar nga gisuruyan niini sa pag-abot hangtud na sa dihang nadala sa tambalanan. Lakip na usab ang niatiman niini sa hospital.

Matod ni Bernadas nga kon kwentahon, lapas na sa 14 ka adlaw sukad sa una nga test nga positibo ang biktima ug way ni-report kanila sa mga posibleng nataptan niini.

Apan awhag usab ni Bernadas niadtong mga local ug mga tawo nga anaa sa mga lugar diin niagi ang Chinese national nga nakasinati og mga respiratory symptoms sa pag-ubo, sip-on hilanat, sore throat, ilabi na kon diskompyado, ug sa pamati, dili na kini ang normal flu, giawhag sila nga moduol sa labing duol nga health center aron magpa-assist o sa tambalanan aron masuta dayon ug aron makuhaan sila og history pagsuta kon angay ba sila nga ibutang isip Patients Under Investigation (PUI).