SI PRESIDENTE Rodrigo Duterte kuli nga maghuwat sa Clark International Airport kon ang mga Pinoy nga gi-repatriate gikan sa Wuhan City, epicenter sa coronavirus outbreak, moabot karong Sabado, Pebrero 8.
Si Cabinet Secretary Karlo Nograles, sa usa ka interview tali sa reporters sa Miyerkules, Pebrero 5, niingon nga ang Presidente gusto nga makig-uban sa katawhan.
Apan si Nograles niingon nga ang management staff ug security personnel sa Presidente hayan di motugot kaniya.
Dihang gipangunata kon ang Presidente mosusi ba sa quarantine facility sulod sa Fort Magsaysay sa Nueva Ecija, si Nograles niingon, “No, but the President, (what) he wants to do (is) that he wants to be with the people, but again it would be a different thing with the PMS and PSG, they have their own protocol.”
Ang gipasabot ni Nograles mao ang Presidential Management Staff, nga naghatag og management ug technical support ngadto sa Office of the President, ug sa Presidential Security Group, ang personnel nga gitahasan sa seguridad sa Presidente ug sa iyang pamilya.
Ang gi-repatriate nga mga Pinoy ipaubos sa quarantine sa Fort Magsaysay sud sa 14 ka mga adlaw, ang incubation period sa 2019 novel coronavirus acute respiratory disease (2019-nCoV ARD).
Ang ikatulong kaso sa 2019-nCoV ARD nakompirmar nga usa ka babayeng Chinese national nga taga Wuhan City, China, miagi sa Cebu gikan sa Hongkong. (Estorya sa pahina 3). Miagi sila sa Dakbayan sa Sugbo padung sa Bohol diin sila ningbakasyon.
Mangita
Moabag ang kapulisan sa lalawigan sa Bohol human makompirmar nga adunay laing Chinese tourist nga naka bisita sa maong probinsya nga nag positibo sa 2019-nCov ARD.
Matod ni Bohol provincial police director Police Colonel Jonathan Cabal l director sa kapulisan sa Bohol nga mag tagbo ang mga opisyal sa Department of Health ug local nga kagamhanan sa lalawigan nga naglangkob sa task force nga maoy gitahasan nga mosusi sa posibleng mga nataptan sa sakit.
Magpaabot pa sila kon unsa ang rekomendasyon sa gobernador sa Bohol, apan ang labing siguro nga himuon mao ang pag backtrack sa giagi-an sa maong mga Chinese national atol sa pag bisita sa Bohol.
Dugang ni Cabal nga ang ilang buhaton mao ang pagsusi kon unsa nga fastcraft ang gisakyan niini ug ilhon kinsa ang mga katupad.
Nanglimpyo
Way angay nga kabalak-an ang mga pasahero kay kanunay silang naneguro nga limpyo ang ilang sakyanan sa dagat ug ang mga pasahero nga nanakay tungod sa preventive measures nga ilang gipatuman.
Sa interbyu sa Superbalita Cebu, si Daisy Sypieco, marketing manager sa Weesam fastcraft, niingon nga ang matag personnel nila gihatagan og masks aron paglikay niini nga mataptan.
Lakip sab sa gibuhat sa Weesam mao ang pagpahunaw og alcohol sa kada pasahero niini matag mosakay ug mokanaog sa ilang fastcraft.
Sigon ni Sypieco nga mag-estasyon ang ilang mga staff kon dili magsuroy-suroy sa ilang fastcraft aron mahilayo sa 2019-NcoV ang ilang mga pasahero.
Dugang ni Sypiecco nga sa dili pa sakyan og pasahero ug matag naog sa tanang mga pasahero, ilang i-disinfect ang tibuok pasilidad sa ilang fastcraft.
Mabantayan
Aron mahatagan og mas hugot nga seguridad ug monitoring ang tanan nga mga pasahero nga gitugutan nga mag home quarantine, buot ni Gobernador Gwendolyn Garcia nga pabantayan 24 oras sa kapulisan ug barangay tanods ang ilang mga balay.
Kini maoy gipahibawo ni Garcia atol sa pakighinabi sa mga tigbalita sa Miyerkules, Pebrero 5 human napirmahan niini ang Excutive Order (EO) No. 5 pag paubos sa mga pasahero sa 14 ka adlaw nga quarantine sa pasilidad nga giandam sa DOH ug Lalawigan sa Sugbo.
“The PNP that will secure the place will be expected to be there securing the place, I have requested that. Also, to show the other persons in the community that in fact there is a very strict protocol and very strict monitoring being done by the PNP and the barangay tanods that I shall request also to stay around the premises”, matod ni Garcia.
Gawas sa mga tanod ug pulis nga mobantay sa palibot, buot usab niini nga mohimo og daily o hourly monitoring ang municipal o city health officers sa pasyente sa panimay niini.
Way sarok festival
Nadesisyonan sa kagamhanan sa lungsod sa Consolacion nga i-postpone lang una ang ilang Sarok Festival karong adlawa, Pebrero 6.
Kini subay sa giluwatang memorandum sa Department of Interior and Local Government (DILG) kalabot sa pagkanselar lang una sa tanang kalihukan nga adunay daghang tawo o gatherings samtang padayon ang hulga sa 2019-nCoV ARD.
Ang Sarok Festival mao unta ang magsilbing highlight sa ika-100 nga tuig nga kasumaran sa Consolacion isip lungsod kun centennial celebration.
Matod ni Consolacion Mayor Joannes “Joyjoy” Alegado nga wa pa sila makadesisyon kon kanus-a nila ipahigayon ang Sarok Festival human sa pag postponed niini.
Samtang, gikataho nga aduna’y pipila ka tunghaan nga nagdumili pagpasulod og ginikanan o guardian sa mga bata nga tinun-an kon wa nag-mask.
Apan si Department of Education (DepEd) 7 Regional Director Salustiano Jimenez nagkanayon nga di kinahanglan nga mag-mask aron makasulod sa mga pampubliko nga tunghaan.
Matod sa direktor nga wala pa hinuon sila makadawat og reklamo kabahin niini.
Ang Superbalita Cebu nakadawat og nagkadaiyang taho nga aduna’y mga pampubliko nga tunghaan nga nagdumili sa mga ginikanan o guardian sa pagsulod sa tunghaan nga wala nag-mask. (AYB, ANV, HBl, GCM)