WALA pay tuig nga milingkod isip direktor sa Police Regional Office (PRO) 7, si Brigadier General Valeriano de Leon nakurat human makadawat og tawag gikan sa Camp Crame nga hulipan siya sa katungdanan sugod karong adlawa, Pebrero 7.
Ang mohulip kaniya ang deputy regional director for operation sa National Capital Region Police Office nga si Brigadier General Albert Ignatius Ferro.
Si de Leon idestino sa Office of the Chief PNP isip floating status.
Matod ni General de Leon nga wala siya magtuo nga hulipan siya sa katungdanan bisan pa man nga niubos ang ilang ranking sa tanang police regional office lukop nasud.
Apan isip usa ka police officer wala siyay mahimo gawas sa pagtuman sa kamandoan gikan sa iyang labaw.
“As a good soldier, I have to follow. Whatever reasons, we abide by any order. It’s a usual routine to us, mayroong ma-relieve mayroong ma-install,” matod ni de Leon, diin normal na ang dalidaing pagpabalhin kanila og pwesto.
Wala masayod si de Leon kung unsay hinungdan nganong gipahulipan siya sa katungdanan apan dako ang pagduda niini nga kadtong tulo ka mga police officer nga nasakpan nga matod pa nagduwa og golf panahon sa oras nga ting trabaho.
Oktubre 17, 2019 milingkod isip hepe sa PRO 7 si de Leon ug sulod sa tulo ka buwan dagkong accomplishment ang iyang gipasigarbo.
Usa sa iyang gipanghambog ang malampusong Sinulog 2020 diin walay natala nga dagkong hitabo ug ang pagkasakmit sa daghang illegal nga drugas nunot sa ilang sub-sub nga anti drug operation.
“Yung quality ng aming accomplishment kilo-kilo pati mga ASG. Yung zero related crime ng Sinulog. Alam mo naman personal akung nandyan,” dugang ni de Leon.
Matod niya nga aduna pa unta siyay daghang programa nga ipatuman sa kapulisan sa Central Visayas apan tungod sa mando pag hulip kaniya maputol na kini.
Si Ferro classmate ra usab ni de Leon sa Philippine Military Academy (PMA) class of 1989.
Dugay nga nadestino sa PNP Drug Enforcement Group si Ferro lakip na sa Firearms and Explosives Unit ug ang kontrobersyal nga anti-illegal drugs group apan niadtong 2017 gibungkad kini human sa kamatayon sa usa ka Korean businessman sulod sa Camp Crame.
Sunod semana gitakdang himuon ang turnover of command sa PRO 7. (AYB)