LAING atraksyon na usab sa lalawigan sa Misamis Oriental ang masuroyan ug maligoan sa Misamisnon human bag-o lang gibuksan ang Sapong Cold Spring nga nahimutang sa Barangay Tabok, lungsod sa Lagonglong, Misamis Oriental.
Sayon tultolon ug dili layo sa sentro, maabtan ug mga sakyanan ang nahimutangan niini, hinungdan dili god maglisod ang mga turista sa pagsuroy ug paghulom sa sa tin-aw ug labihan ka bugnaw nga spring.
Ang Sapong Spring dugay na nga panahon nga naila sa lungsod ug ngani gikonsidera kining top tourist destination sa lalawigan kaniadto apan gumikan kay gikaso ang luna niini ug naangkon sa lumad nga nanag-iya sa luna maoy hinungdan nga nawala sa kamot sa pagdumala sa local nga kagamhanan. Niagi ang mga niaging administrasyon duyog sa kapanahonan ang cold spring wala mamintinar ug kini napasagdan.
Apan tuig 2019, ang administrasyon ni Mayor Jay Albert Puertas nakigkoordinar sa tag-iya sa luna ug maayong balita ang mitabo kanila human nga ibaligya kini sa tag-iya ngadto balik sa lokal nga kagamhanan.
Sa kantidad nga P5 milyon, wala nagduha duha ang kagamhanan nga paliton kini apan matud ni Puertas nga tungod sa kakulang sa pundo sa lokal nga panudlanan nihangyo siya sa kagamhanan sa probinsya ngadto kang Misamis Oriental Governor Bambi Emano nga matabangan mapalit og balik ang sapong spring.
Si Emano nga miingon nga pag-abot sa turismo ug pagpalambo, pagpanindot sa mga tourist spot dili siya magmakuli sa pagtabang hinungdan tunga sa kantidad gisagot sa probinsyal ug gawas niini nihatag og dugang pundo alang sa pagpa renovate niini.
Pila ka bulan ang nilabay gisugdan ang renobasyon sa Sapong Spring, niadtong Enero 31, 2020 gipahigayon ang soft opening niini.
Ang pagblessing niini gipangunahan ni Fr. Neil Limbaco ug mga dagkong personalidad sa probinsyal ug lokal sama nila ni Governor Bambi Emano, Gingoog City Vice Mayor Peter Unabia, Lagonglong Mayor Jap Puertas, mga ulo sa departamento ug katawhan sa Lagonglong.
Sa kasamtangan nga soft opening mokantidad sa P35 ang entrance fee apan kung hingpit na nga matapos ang renobasyon mokantidad na sa P50 ang entrance fee niini kini aron makamintar ug makapalahutay sa operasyon sa Sapong Spring.
Nindot, tin-aw ug labihan ka bugnaw nga siguradong balikan sa gimingaw na nga mga Misamisnon sa ilang paboritong cold spring kaniadto.