PATAY ang giingong notoryus nga lider sa gitouhang New People's Army (NPA) human gikataho nga misukol dihang gisilbi ang warrant of arrest niini mga alas 11:00 sa buntag sa Pebrero 5, 2020 sa Rosales St., Barangay 15, San Ignacio, Butuan City.
Ang napatay giilang lider sa Communist NPA Terrorist (CNT) mao si Manuel M. Gilo alyas Jino/Saldo.
Giingong usa kini ka finance officer sa Regional Operations Command ug dako sa Special Operations Group sa Southern Mindanao Regional Committee (SMRC).
Usa ka hiniusang operasyon ang gilusad sa Philippine Army uban ang Criminal Investigation and Detection Group (CIDG)-Caraga, ug Philippine National Police Regional Office-Caraga aron mosilbi sa warrant of arrest niini sa kasong robbery with homicide apan giingong nakigpinusilay pa si Gilo, hinungdan gibaslan ug napatay kini.
Narekober sa crime scene ang usa ka kalibre .45, pito ka round sa bala sa kalibre .45, laptop, motorsiklo ug cellphone.
Matud ni Brigadier General Maurito L. Licudine, ang commander sa 402nd Brigade sa Caraga, nga ang napatay nalambigit sab sa mga bayolente nga kalihokan pag-atake sa mga sundalo ug sibilyan.
Gitumbok kining suspek sa pagpatay ni Datu Ruben Labawan tuig 2015; pagkidnap sa Jail Warden Coquilla sa Compostela tuig 2015; pagkidnap ug pagpatay ni Loreto, Agusan del Sur Mayor Dario O. Otaza ug anak nga si Darryl O. Otaza sa Butuan City tuig 2015; pagpangatake sa mining compound ni kanhi Mayor Brillantes sa Brgy Olaycon, Monkayo nga miresulta nasakmit ang 74 ka klase klaseng HPFAs sa tuig 2016.
Lakip sa gikalambigitan niini ang giingong pagdisarma sa peace and order personnel sa Barangay Mahungcog, Magpet tuig 2016; ang pagpangatake sa Lorenzo Residence sa Calinan, Davao City; pagpangsunog sa Lapanday Corp. Plastic Plant sa Mandug, Davao City tuig 2017 ug Macondray Corp. Plastic Plant sa Panabo City tuig 2017; ug lakip ang Construction Company heavy equipment sa Barangay Callawa, Davao City tuig 2018.
"The excellent partnership between and among the law enforcement agencies became the key piece of this victory of the people. Justice has been served for all the sufferings and deaths Gilo had incurred to the people. It is a testament that the long arms of justice will catch these CNTs. They can run but they cannot hide for long. It is tragic that they take up arms against the government. I reiterate once again the government's call for the CNTs to avail the E-CLIP, surrender and go back to their families," pahayag ni Licudine.