DAVAO DEL NORTE -- Tungod sa gikahadlokang sakit nga 2019 novel coronavirus acute respiratory disease (2019-nCoV ARD), pipila ka mga guest relations officer (GRO) nagsulti nga likayan una nila ang pakighilawas sa mga kustomer nga Chinese.
Kini ang gibutyag ni alyas Mae, 21, nagtrabaho isip GRO sa usa ka balay kalingawan sa siyudad sa Tagum.
Saysay ni alyas Mae nga mas nabalaka silang mga "Angel of the Night" sa mikuyanap nga coronavirus kumpara sa sakit nga Human Immunodeficiency Virus (HIV) o Acquired Immunodeficiency Syndrome (Aids), sanglit sa HIV aduna naman silay kahibalo sa paglikay niini pinaagi sa condom nga ipagamit sa buot makighilwas kanila, kumpara sa sakit nga nCoV-ARD nga wa pay tambal nga nadiskubreng mopakgang sa kagaw.
"Nahadlok ko oy, kay sa akong nasayran, maskin dili ta makig-sex, matakdan gihapon ta... mao nga iwas-iwas lang sa ta sa mga Chinese nga customer kay sila man kaha ang nagdala nianang maong sakit," kabalaka ni alyas Mae.
Matud pa nga kung kaniadto, mag-ilog sila sa iyang mga kauban sa trabaho nga mo-table sa mosulod nga foreigner sa club nga ilang gitrabahoan, karon ila usa nga susihon kung dili ba kini Chinese ug dili ba itsura nga masakiton.
"Sa kabahin nako, maneguro ko oy labi na kay naa koy duha ka mga gagmay'ng anak. Sus, kung mataptan ko nianang sakita, kinsa may mobuhi sa duha ko ka mga anak," dugang pagtuaw niya.
Ang pagsul-ob og mask sa panahon sa trabaho, wa gihimo ni alyas Mae sanglit di makit-an ang iyang kaanyag ug kaguwapa kung aduna siyay mask sanglit ang iyang kaanyag mao ra ba kuno ang iyang puhunan.
Samtang sa kabahin sa 24 anyos nga si alyas Suzette nga anaa nagtrabaho sa usa ka balay kalingawan sa probinsiya sa Davao de Oro, gibutyag niya nga andam siya nga i-out sa usa ka Chinese basta lang kuno kaila siya sa maong Chinese apan kung wa siya makaila ug sa tan-aw niya nga masakiton kini, niwang ug tiguwang pa gyud, di siya mosugot i-out.
"Kung ang makig-out nako kanang atong mga opisyal sa probinsiya nga may dugong Chinese, okey ra kaayo, sukol ta! Bahala'g tiguwang... kaila man ta ana nila pero kung Chinese nga kalit lang mobutho ug mora'g himatyon ang lawas ug manghagad og sex, bahala ka oy, imo na lang na imong kuwarta," nagkatawang pung ni alyas Suzette nga miguwa ang duha ka kandiis sa aping.
Hinuon, wa pay natalang nataptan sa sakit nga coronavirus o kaha person under investigation sa Davao de Oro ug Davao del Norte.
Apan alang kang alyas Suzette, gikinahanglang mag-inampingon labi na sama nila nga ang puhunan mao ang ilang lawas. (Dexter T. Visitacion)