USA ka oplan ang gihimo aron pagtul-id ug pagkoordinar sa mga mobile administration sa mga motorbangka ug mga gagmay nga mga watercraft sa tanang bahin sa Sugbo ug Bohol.
Nipirma og memorandum of agreement (MOA) ang Philippine Coast Guard (PCG) Central Visayas, Marine Investigation Authority (Marina) Central Visayas ug ang Department of Tourism (DOT) Central Visayas alang sa pagkahiusa sa pagtuman sa Oplan Integrated System to Legitimized Activities at Sea (Islas).
Ang Oplan Islas mao ang pagrehistro sa mga motorbangka nga gigamit nga panginabuhian sama sa island hopping nga mao'y sikat sa mga turista. Kini aron mapatuman pinauyon sa giya nga gihatag sa mga awtoridad sulod sa komunidad sa baybayon ug sa mga isla sa rehiyon.
Si DOT Central Visayas Regional Director Shalimar Tamano nisaysay nga ang island hopping ang usa sa nakapaduso sa turismo sa rehiyon. Aduna'y dul-an sa 600 ka mga pumpboat ang nag-operate nga nahimutang sa tibuok Central Visayas.
“In the law, Tourism Act 9595 said that all tourist transport should be accredited. Which means, it doesn't matter if it is a van or if it is a boat. Since island hopping is 95 percent to 100 percent for tourist only, they should be accredited,” saysay ni Tamano.
Dugang niya nga sulod sa usa ka tuig nila sa maong operasyon, aduna na sila'y 70 ka akreditado nga mga pumpboat sa Central Visayas ingon man sa tibuok nasud.
Ang DOT Central Visayas usab ang mosusi sa mga dokumento ug safety requirements sa mga bangka nga apil sa operasyon sa mga turista sa wala pa kini mapamatuod.
Si PCG Central Visayas District Director Commodore Joseph Badajos nisaysay nga ang PCG mao ang mosiguro ug mo-monitor sa seguridad ug sa sa mga motorbangka. Mohatag pud sila og ayuda sa DOT Central Visayas sa ilang pagrehistro.
Dugang ni Badajos nga ang Coast Guard usab ang mopatuman sa Safety Security and Environmental Numbering sa tanang gagmay nga mga bangka.
Sigon ni Marina Central Visayas Director Marc Anthony Pascua nga ang maong aktibidad naghimo og kalig-on sa seguridad sa maritime, ilabi na sa Central Visayas, nga mao ang numero uno nga tourist destination sa tibuok nasud. Motabang pud ang Marina sa pagsusi sa mga kasunoran sa seguridad ug mopahigayon sa mga registration.
Sunod semana, magpadayon sila sa ilang operasyon sa nagkalaing lugar sama sa Moalboal, Panglao sa Bohol ug uban pa. (JCT)