HINAY man tuod nga nakasugod, apan ang kainit sa fourth quarter maoy nahimong yawe sa kadaugan sa Los Angeles Clippers aron pukanon ang Miami Heat, 128-111, sa National Basketgball Association (NBA) kagahapon.
Nakaguba sa zone defense sa Miami mao ang pagpauwan og tres sa Clippers sa three-point area.
Tagsatagsang mikusnit og 23 puntos sila si Paul George ug Landry Shamet aron pangulohan ang laing unom ka mga Clippers nga pulos naka double-figures sa ilang ikatulong sunodsunod nga kadaugan.
“We were moving the ball against the zone, getting the right shots. We just weren’t making shots,” matod ni Shamet, kinsa usa lay napasulod sa pito ka itsa sa firsth half. “It all started to come together in the second half.”
Niini, ang Clippers nakahimo og franchise-record nga 24 ka tres, diin ila pang napalabwan ang 20 ka tres nga ilang napakatap batok sa Houston Rockets niadtong 2016.
“It was a deluge, avalanche in that second half of 3s and we just couldn’t get a handle on it,” ingon ni Heat coach Erik Spoelstra. “It was one of the better 3-point shooting displays I’ve been on the other end of. Probably the biggest one.”
Wala na paduwaa sa Miami si Jimmy Butler sa fourth quarter tungod sa pagkapiang sa iyang tuo nga abaga. Ipaubos siya sa MRI karong adlawa.
“Just hope it ain’t nothing major,” matod ni Butler. “I want to be out there again on the wood with my guys.”
Si Kawhi Leonard midugang og 14 puntos, siyam ka assists ug pito ka rebounds alang sa Clippers kinsa nabiyaan og 12 puntos sa first half sa wa pa nila makontrolar ang katapusang duha ka period.
Dili lang siya ang nangigo sa fourth canto kon dili hasta na usab sila si JaMychael Green nga may tulo ka tres, katapusang niini maoy nakapabukad sa ilang bintaha, 107-92.
“After the initial shock of the zone, we held them very well. We spaced the floor and we got great shots,” matod ni Clippers coach Doc Rivers. “At halftime they said, ‘Maybe we should drive more.’ I said, ‘You’re wide open, shoot them.”
Si Derrick Jones Jr. nangulo sa unom ka mga players sa Heat nga nakapugnit og diyes puntos o kapin pinaagi sa iyang 25 puntos nga moay iyang career high, ug siyam ka rebounds.
Midugang si Bam Adebayo og 22 ug 11 ka boards.
Mosulong sa Sacramento ang Heat ugmang adlawa samtang ang Clippers moasdang sa Timberwolves sa Dominggo.
Sa laing mga duwa, midaog ang Pistons batok sa Suns, 116-108; Celtics batok Magic, 116-100; Nets batok Warriors, 129-88; Toronto Raptors batok Indiana Pacers, 119-118.
Gibungog usab sa Thunder ang Cavaliers, 109-103, gikunis-kunis sa Grizzlies ang Mavericks, 121-107. Gipawongan sa Nuggets og sonata ang Jazz, 98-95. (JBM)