ADUNA’Y dugang 23,000 cubic meters nga supply sa tubig matag adlaw ang gikatakda nga mapuno sa kasamtangang supply karon sa Metropolitan Cebu Water District (MCWD) karong tuiga.
Kini aron usab pagsulbad sa kakuwang sa supply sa tubig nga di na 24-oras ang agas.
Gawas sa mga bulk supply, aduna’y mga in-house wells ang gitukod sa MCWD o kining mga tag-iya nga nisugot nga butangan og atabay ilang dapit aron usab di magnihit ang supply sa ilang dapit.
“The water district is prioritizing in-house wells in areas where the demand for water is high since these are easy and fast to develop and are not easily affected by the dry spell as well,” matod ni MCWD acting general manager Stephen D. Yee.
Ang water demand sa Sugbo anaa sa 580,000 cubic meter matag adlaw samtang anaa lang sa 233,000 cu. m. ang produksyon sa MCWD.
Sa Enero karong tuiga, anaa sa 223,000 cu. m. ang average nga production sa MCWD matag adlaw.
Nipasabot ang MCWD nga ang 10,000 cu. m. nga kakuwang tungod kini sa mga wala’y kuryente o kining power outages, leak, ug preventive maintenance sa water district.
Apan karon nga gipaabot na ang pagnihit sa uwan,nagtuo ang MCWD s pagkunhod sa daily production.
Ang bag-ong in-house production wells sa MCWD nga anaa sa 3,000 cu. m. matag adlaw, makabenipisyo ang Barangays Sambag I ug Capitol Site sa Cebu City; Cubacub sa Mandaue City ug San Isidro sa Talisay City.
Sugod Hunyo usab karong tuiga, dugang 15,000 cu. m. ang ipuno sa production sa MCWD gikan sa bulk supplier niini nga Mactan Rock Industries Inc.
Sa 15,000 cu. m., 10,000 cu. m. niini gikan sa ilang mga tabay sa Compostela; 2,000 cu. m. sa ilang pasilidad sa Marigondon-Gabi ug 3,000 cu. m. gikan sa Tejero, Cebu City, matag adlaw kini.
Aduna usa’y kalambuan sa supply sa amihanang Sugbo sa pagsulod sa supply sa Danao City Bulk Water Supply Project nga magsugod karong tunga sa tuig.
Ang proyekto, mo-supply og 10,000 cu. m. matag adlaw nga tubig sa MCWD.
Kinahanglan pa kompletohon sa Danao City Government ang duha ka kilometro nga tubo niini aron mokonektar sa tubo sa MCWD sa Compostela.
Sa labing uwahi nga datus sa MCWD, Huwebes, Pebrero 6, anaa sa 3,000-5,000 cu. m. ang kasamtangan nga ma-supply sa Buhisan Dam gikan sa normal niini nga 7,000 cu. m. matag adlaw ug anaa sa 30,000 cu. m. matag adlaw usab ang Jaclupan Facility itandi sa 33,000 cu. m. nga normal niini. (HBL)