MILUWAT og bag-o nga kamandoan si Gobernador Gwendolyn Garcia sa mga lokal nga kagamhanan sa lalawigan sa Sugbo pag-umol og kaugalingon nga 2019-nCoV ARD Task Force nga maoy mag monitor sa palibot ug kapuy-an sa moabot nga mga pasahero nga taga Sugbo nga gitugutan nga mag home quarantine.
Kini maoy gipahibawo ni Garcia atubangan sa mga local chief executive ug kapulisan sa panagtigom niadtong Huwebes, Pebrero 6, 2020.
Ang task force pangulohan sa mga local chief executive ug langkuban sa municipal o city health officers, barangay tanods, social welfare and development officers (SWDO), chief of police (COP), barangay kapitan nga gi-identify sa pasahero nga iyang kapuy-an.
Protocol
Base sa mando nga pag-abot sa mga pasahero sa Mactan Cebu International Airport (MCIA), ang pasahero mopaubos sa pagsusi sa Bureau of Quarantine (BOQ).
Kon tugutan nga mag home quarantine ang pasahero, pahibaw-on sa quarantine team ang mayor sa lokal nga kagamhanan nga susihon ang lugar ug balay nga puy-an sa pasahero.
Ang municipal o city social welfare and development officers maoy mohimo og profiling, monitoring ug validation sa pasahero ug gipuy-an niini.
Matod ni Gobernador Gwendolyn Garcia nga ang himuon nga validation tungod may mga puy-anan nga wa makapasar sa kondisyon subay sa Executive Order No. 5 Series of 2020.
“Yes, pag inspection sa MHO ug social welfare, wala masunod ang tanan, wala mohaom ang ilang ka puy-an sa mga kondisyon nga atong gibutang like katong butangan og kaugalingong kwarto”, matod ni Garcia atol sa pakighinabi sa mga tigbalita.
Human sa pagsusi, pahibaw-on ang quarantine team kon nakapasar ba sa rekisitos ang puy-anan sa pasahero.
Kon di makapasar ang kapuy-an, dalhon ang pasahero sakay sa sakyanan nga gitagana sa Kagamhanan sa Lalawigan sa Sugbo padulong sa iyang puy-anan.
Subay sa mando, kinahanglan nga motudlo og representante ang mayor nga maoy mo-supply og impormasyon sa developments sa pasahero sa quarantine team sa lalawigan sa Sugbo.
Ang mga health officers maoy gitahasan nga mopahigayon og daily o hourly monitoring sa person under monitoring (PUM).
Ang PUM mao ang mga tawo nga nakabiyahe sa mga dapit sa China ug administrative regions ug kadtong mga nakauban sa mga positibo sa 2019 novel coronavirus acute respiratory disease (2019-nCoV ARD).
Kinahanglan nga mohatag usab og hourly ug daily information ang health officers sa quarantine team aron kon dunay makitang simtomas sa 2019-nCoV ARD sama sa ubo, sip-on ug hilanat, kuhaon kini sa iyang balay ug ibalhin sa gitagana nga quarantine facility.
Asa ibutang
Ang pasilidad mao ang Eversely Childs Sanitarium and General Hospital, Project New Life nga usa ka rehabilitation center nga wa pa magamit sa lungsod sa Pinamungajan, ug ang Women and Children Development Center sa barangay Lahug sa dakbayan sa Sugbo.
Atol sa 14 ka adlaw nga monitoring sa PUM, kinahanglan nga ipatuman sa kapulisan ug sa barangay tanod ang 24 oras nga pag-bantay sa palibot og sa panimay niini.
Apan kon ang PUM way simtomas sa paglabay sa quarantine period nga 14 ka adlaw, isyuhan kini og certificate of completion sa task force pagpamatuod nga mi-agi kini sa 14 ka adlaw nga quarantine.
Mga gi-monitor
Sa uwahing datos sa Department of Health (DOH) may 29 ka mga persons under investigation (PUI), 21 sa Sugbo, pito sa Negros Oriental ug usa gikan sa Bohol.
Ang PUI mao ang mga tawo nga dunay mga timailhan sa 2019-nCoV ARD.
Ayuda
Sa laing bahin, giawhag ni Garcia ang tanan nga mga local chief executive sa 44 ka mga lungsod ug pito ka mga dakbayan sa lalawigan sa Sugbo pagduso og resolusyon pagpaubos sa mga lungsod sa state of preparedness.
Subay niini, mohatag og P25.5 milyones nga ayuda ang Kagamhanan sa Lalawigan sa Sugbo sa 51 ka mga lungsod ug munisipalidad alang sa pagpalit og protective personal equipment (PPE) sama sa face masks, gloves, alcohol ug uban pa nga disinfectants nga magamit sa task force ug frontliners nga mga health worker.
Ang matag lungsod makakuha og P500, 000 gikan sa Cebu Provincial Treasurer Office (CPTO) human nga makadeklarar na kini og SOP.
Ang pundo kuhaon gikan sa disaster fund sa lalawigan.
Kini human sa reklamo sa mga mayor nga wa nay mapalit nga mga protective equipment sa mga tindahan.
“Immediately, I will instruct the treasurer to issue kay this is a more urgent nature than socio-cultural. Karon pa lang, ipaandam na lang nako kay dugay man gud na ang processing”, matod ni Garcia.
Samtang aron mas mahimong luwas ang lalawigan, gitan-aw usab ni Garcia ang pakigtagbo pag-usab sa mga opisyal sa paluparan alang sa bag-ong mga protocol nga ipatuman niini.
“I look at that kana nga loophole right now because we have stengthened the airports and the domestic. I will meet again with the airport management in order to set up protocols for the domestic arrivals”, matod ni Garcia.
Samtang ang lungsod sa Medellin supak nga himuon nga quarantine center ang rehabilitation facility nga nahimutang sa lungsod kay naa kini sa publikong dapit nga dunay mga buhatan.