TUNGOD sa kataas sa panginahanglan sa mga surgical mask, dunay mga tawo nga mapahimudsanon, ilang gibaligya ang papel nga mga mask nga di magamit.
Duna usay pipila ka mga pharmacy nga nagpa overprice sa ilang stock taliwa sa kahadlok sa katawhan sa 2019 novel coronavirus acute respiratory disease (2019-nCov ARD).
Mao kini ang nakaplagan sa joint Cebu City inspection team sa ilang paglibot sa downtown Cebu City sa Huwebes sa buntag, Pebrero 6, 2020.
Ang team gilangkuban sa Department of Trade and Industry (DTI), Philippine National Police Cybercrime Group ug Criminal Investigation and Detection Group, Department of Health, Food and Drugs Administration, ug Cebu City Government.
Lima ka mga manindahay sa mga stall sa Leon Kilat st. gipahimangnoan ug ang papel nga face masks gisakmit sa inspection team.
Si Cebu City Market Administrator Jonil Matuguina, kinsa niapil sa inspeksyon, niingon nga ang papel nga face masks di makapanalipod sa tawo gikan sa mga sakit kay wa kini filter, di sama sa surgical masks.
Gibaligya usab kini nga way sudlanan.
“It’s unsafe because we don’t know where they got it because it has no cover when it was sold,” siya nagkanayon.
“It has no label where it came from,” dugang ni Matuguina.
Gikinahanglan nga dunay pagtugot gikan sa FDA kon mamaligya og face masks.
Matod ni Diana Tindoy sa FDA 7 regulatory office nga wa pa silay gidakop, apan nagpahimangno sila sa sidewalk vendors nga sila dakpon na kon subling masakpan.
Si DTI 7 Consumer Protection Division chief Ines Cajegas nisulti sa SunStar Cebu nibutyag nga sila nakasakmit og 550 ka face masks gikan sa mga ambulant nga manindahay duol sa usa ka mall sa dan Colon nga namaligya og masks nga mas taas sa suggested retail price (SRP) nga P2 ngadto sa P8 nga gitakda sa Department of Health (DOH).
“The problem with these ambulant vendors is they’re here today and gone tomorrow. You can’t really trace them because another vendor will replace them,” siya nagkanayon.
Mga mask gikan ning mao nga mga manindahay ibaligya og tag P10 sa buntag, apan mahimo nang P20 sa paghagtok sa alas 6 sa gabii ug duna pay moabot og P50.
Bisan tuod kon nakaplagan sa inspection team nga sagad sa mga pharmacy nituman, dunay tulo nga giisyuhan og notice to explain, matod ni Matuguina.
Siya niingon nga dunay mga taho nga ang mao nga mga pharmacy nagpa-overprice, kay ang tulo nipaumento sa ilang masks og hangtod sa 30 porsyento gikan sa orihinal nga presyo.
Ang DTI maoy naghupot sa imbestigasyon.
Si Matuguina niingon nga ang team nisusi sa pito ka mga pharmacy sa downtown area, upat kanila niangkon nga nahutdan sila og stock.
Mitubag
Samtang sa pito ka mga botika nga gipadad-an og show cause order sa DTI, tulo kanila ang ningtubag.
Matod ni Cajegas nga ang mga rason sa mga botika nagkadaiya gikan sa gasto sa cargo ngadto sa matag sa face mask.
“One of the pharmacy said that the mask the customer brought was not the usual surgical face mask but the one with the filter so it was pricier than normal. The other said they had to fetch their mask supplies from the airport so there was additional cost while the third one alleged they didn’t know the price ceiling for the masks,” siya nagkanayon. (JJL, JOB, BBT)