ILADO na sila sa kauban nilang mga pulis. Basta ang patrol car may numero 673 nga alisto mo-responde sa mga kaso sa pagsikop sa mga kriminal nga may kaso sa gidiling mga drugas.
Mga ninja cops sila. Makasapi na sab sila.
“Unsa man? Mahataas ang sentensiya mo o mahamubo lang?” mihulga dayon si Dario ngadto sa nasikop nilang durg pusher .nga ilang nahantok. “Duha ka kilong shabu kining nakuha namo. Ireport lang namo niini ang diyutayng gramo sa shabu aron maminusan ang kaso mo.”
Miduga ang drug pusher ug mihatag og katunga sa usa ka milyong sapi. Hapihapi na sab sila si Dario sa dako nilang kinitaan. Itago nila ang subrang nasakmit nga shabu ug i-planting kini niadtong mga durugista aron modugo kinig sapi nga ikahapi-hapi nila. Dihay giingon nga drug queen nga hilabihang seksiha ug guwapaha. Gisolo kini sa pag-tokhang ni Dario ug iyang nalaang. Wala niya dakpa ang drug queen nga si Stephanie ug gihimo kini niyang kapuyo. Labi pang nasapian si Dario ug nakapalit og pipila ka ektaryang yuta sa ilang halayong lungsod.
May mahalong mga sakyanan ang mga ninja nga pulis, apan gibutang kini nila sa mga ngalan sa ilang mga kadugo ug kasaligan nga mga higala. Basta may mga kabtangan, iparehistro kini nila sa laing mga ngalan aron dili sila mabisto sa ilang ka-corrupt ug inabtikay.
Maskin unsa ka-kurap ug kamanyak si Dario moila gihapon kini nga may pamilya siya. Gimahal niya ang iyang asawa ug lima ka anak. Naghingapin ang kabuhong sa iyang pamilya.
Ang iyang asawa magpangutana na unta kaniya kalabot sa daghang salapi, apan dili na lamang maggunok kay isog ug bagsik si Dario. Taslakan ang iyang misis. Mihulga si Dario nga kon hilabtan ang sekreto niyang kinitaan, mobuno kini sa kabanay sa iyang asawa. Mao nga hilom usab ang kabanay sa iyang asawa. Apan ang ginikanan ug mga kadugo ni Dario nahauyon sa mga kabuang ug kadautan ni Dario kay gitagbaw sa daghang mga sapi ug kabtangan.
“Aron di ka maglibog, my love,” ug motunol siyag bagang sapi sa iyang asawa, “mag-shopping kamo kanunay. Enjoy with the money in shopping mall.”
Dihang may mitawag sa main base sa estasyonan sa kapulisan ug gisangpit ang patrol car 673, sila si Dario nga nag-inom sa usa ka beerhouse sa dakbayan wala dayon mosanong kun moresponde sa alarma nga may nanulis sa usa ka prendahanan og mga alahas kun pawnshop sulod sa dakong shopping mall. Naglangay-langay sila. Gihurot una nila ang ilimnong makahubog.
“Buysit! Di ta makasapi niana!” nagtagawtaw si Dario samtang miluwan sa ilang patrol car. “Mga tulisan ray mabulahan niining kalakiha ug madisgrasya pa ta sa mahimong pinusilay. Buysit!”
Nahiabot sila sulod sa shopping mall. Nakaipsot na ang mga tulisan. Duha ka security guard natipi sa pinusilay. May mga kawani sa pawnshop nga nangaangol ug nangamatay. Ug may mga shopper kun nanuroy ug namalitay sa shopping mall ang minghay-ad sa salog nga wala nay kinabuhi. Nagbaha ang dugo sa salog. Makalilisang. Ug kalit lang mikurog ug mitiyabaw si Dario. Tataw niyang nakita ug nasud-ong ang iyang asawa ug mga anak nga nagbuy-od sa kamatayon. (Katapusan)