Super Suroy: Ang bag-ong Boracay

SILHOUETTE: Gi-enjoy ning tigsuwat ang pagsawop sa adlaw nga mi-amag sa palibot sa bulawan. (Hulagway kuha ni Charry Lane Coronel)
SILHOUETTE: Gi-enjoy ning tigsuwat ang pagsawop sa adlaw nga mi-amag sa palibot sa bulawan. (Hulagway kuha ni Charry Lane Coronel)

BORACAY is back! Human sa unom ka buwan nga pagsira niini gumikan sa rehabilitasyon, nanawat na pagbalik ang isla og mga turista sukad niadtong Oktobre 26, 2018. Ang pangutana, worth it ba ang pagpasira niini sulod unom ka buwan?

Usa sa labing hyped nga tourist attraction sa Pilipinas mao ang Boracay Island nga nahimutang sa probinsiya sa Aklan.

Tanang tawo nga akong nahimamat, nangandoy nga makasuroy sa dapit. Naila ang Boracay sa puti ug daw sama pulbos ang balas ug tin-aw nga dagat nga susama nga mosidlak kon mahayagan.

Niadtong 2017, giila sa usa ka global travel website ang isla isip “world’s best beach” ug “best Asia’s island.” Niadtong 2018, nalakip ang Boracay sa Traveler’s Choice Awards ug gipasidunggang sa Conde Nest Travel isip 2019 world’s best island.

Karon nga gi-ablihan na kini pagbalik, daghan nang kausaban ang gipatuman sa isla isip lakang pagpanalipod sa kinaiyahan ug ang pagpabilin sa katahom sa maong lugar.

Unsay kausaban?

Inig book pa lang sa airline ticket, may pahimangno nga gikinahanglang aduna nay accommodation sa Boracay sa dili pa molupad. Kapin sa 6,000 nalang ang pasudlon nga turista matag adlaw.

Dili usab dali ang pagsulod sa isla sanglit inig abot sa pantalan sa lungsod sa Caticlan, moagi pa og daghang proseso.

Sa pantalan pa lang daan, sukit-sukiton na ang mga turista sa registration sa kadtong buot mo-stay og dugay sa isla, gikinahanglang magpakita og hotel reservation.

Apan mamahimo gihapon nga mag-day tour nga kutob lang 5 p.m. ug gikinahanglang magbilin og valid I.D. sa pantalan.

Adunay tulo ka barangay ang Boracay: Balabag, Manoc-Manoc, ug Yapak. Ang Station 1 ug 2 nahimutang sa Barangay Balabag samtang ang station 3 anaa sa Manoc-Manoc.

Anaa sa station 2 ug 3 ang daghang mga tindahan, kan-anan ug hotels samtang sagad sa mga high-end resorts ug hotels anaa sa station 1 ug ning bag-o lang gitukod ang station X.

Mamatikdan nga nimenos ang traffic sa isla human gipalapdan ang kadalanan. Usa sa matang sa transportasyon sa isla mao ang eco-trike.

Gidili na ang beach parties, pag inom, pagkaon, pagpanigarilyo sa White Island kini subay sa 25x5 meters easement.

Giwagtang na usab ang tinuig nga LaBoracay event.

Gidili na usab ang pagmuntar og payong ug lingkuranan sa beach. Did-an na usab ang pagdala og binuhing kahayupan sa dagat.

Gipasirad-an na ang mga casino ug ubang balay-pasugalan sa isla.

Kon dili mahatagan og disposable utensils lakip drinking straw, ayaw og piyait sanglit gibawal na usab ang single-use plastic.

Bisan sa kausaban, buhi gihapon ang mga patigayon sa isla kay anaa gihapon ang henna tattoo ug hair braiding.

Tanang island activities pagahimoon na sa designated areas. Ang docking area sa mga bangka ug paraw anaa na sa station 3.

Island activites

• Island hopping/land tour - Dili kompleto ang trip sa isla kon walay island hopping o land tour. Pipila sa maadtuan mao ang Crytal Cove Island, Crocodile Island, Puka Beach, ug Ariel’s Point.

• Helmet diving - Usa sa ilado nga activity sa Boracay mao ang Helmet Diving diin imong ma-enjoy ang view underwater.

• Paraw sailing - Mas nindot ang experience sa paraw sailing kon himoon kini pagsawop sa adlaw.

• Banana boat/U.F.O - Alang sa mahiligon sa extreme adventure, recommended ang banana boat ug U.F.O. Aduna hinooy safety gears nga gamiton aron makalikay sa disgrasya.

• Parasailing

• Jet Ski

Unason pag-adto?

Walay direct flight ang Cebu padulong sa Boracay Island apan mamahimong moagi sa Caticlan o ba kaha sa Kalibo, mas duol ang Caticlan sa isla.

Sa Caticlan Jetty Port mosakay og ferry boat padulong sa Boracay nga moabot lang sa usa ka oras nga byahe.

Pag-abot sa Boracay, mamahimong mosakay og traysikol padulong sa gipili nga hotel.

Hangyo lang sa local government unit sa Boracay ngadto sa mga turista nga motabang sa pag-amping sa ilang lugar.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph