MAY gisangpit kang usa ka ngalan
Tataw nga ikaw gialimungawan
Tupad nako ning atong higdaanan.
Gusto lang nakong masayran
Kon diin ka tigsuroyan.
Gusto sab nakong masabtan
Nganong nabugnaw imong tinagdan?
Sa sulti mo andam kong maminaw
Kinsay nakasala sa atong panumpa,
Kinsay kauban mo sa dapit nga mingaw?
Sa panahon sa akong pag-inusara
Naghandom ako ug naghanduraw sa
Mabulukong kagahapon tang mipanaw.
Padungga ko sa imong mga pulong
Nga wa pa nimo kanako ikahunghong.
Pasud-unga ko sa imong mga luha
Nga wa pa mabiaw sa imong mata.
Tagbawa ako sa imong hapuhap
Nga imong gihalad, gisaad paghikap.
Ayaw ni ihikaw kon wa pa mahanaw.
Gipasagdan ko lang ikaw
Sa halayo mong pagpanaw
Apan kanunay akong nagtuaw
Nganong gipalakaw ko ikaw?
Ug karon nasayran ko na
Natataw ug nasabtan ko pa
Kon unsaon ko karon pagpupho
Mga tipaka sa napusgay kong pagtuo.
Gipiyong ko na lang akong mga mata
Dayon nagdamgo natong duha.
Akong ibaligya ang akong kalag
Aron kanimo di mahimulag.
Kini ang saad kong way paglubad.