Talento: Response-able

SA TANANG nagaginhawa pa, pasalamatan nato ang Magbubuhat ta, hallelujah!!! Maayong adlaw, higala!

Si Kobe Bryant ug ang 13 anyos niyang anak, patay na. Tulo ka kaso sa namatay na pod tungod sa 2019 novel coronavirus ang natala sa nasud ta ug morag motaas pa. Ang mga face mask, hurot na. Ang mga mahalong vitamin C na lamang ang mapalit sa mga parmasya. Ang uban naga-panic na; daghan ang nagpabiling kalma apan duna poy mga walay pakialam, miga.

Kung usa-usahon natog hunahuna ang mga panghitabo sa atong palibot ug sa kalibotan, daw maluya ang atong dughan. Ang pag-umangkon sa akong higala nga si "Opaw" sa bularan, nga teenager pa, giatake sa kasingkasing ikaduha, ug karon gihaya na.

Si Sir Roldan nga bana sa akong maestra, naoperahan ang ulo kay nagtibugol ang dugo kay giatakeg hypertension. Dili ba maka high blood ang mga ingon aning balita, igsuon? Oooopzzz, ayaw paapekto gani. Hisgutan nato kini agi'g pangandam, igsuon ko.

Bisan nasayod kitang tanan nga walay permamente dinhi sa kaliboton, dili nato mapugngang maguol sa reyalidad sa mga kamatayon, kalisod ug katalagman. Ang mga lugar sa Australia ug Africa nangasunog ang mga kakahoyan ug ubang adunay kinabuhi sa kinaiyahan.

Matod pa sa akong higala, dili daw kini mahitabo sa Pilipinas tungod na-opaw na ang atong kalasangan sa mga ilegal nga pagpamutol sa mga

kakahoyan busa nahilayo kita sa susamang katalagman.

Aduna pod baya siyay punto bisan dili maayo ang pagkaingin ug pagpamutol sa mga kahoy sa kalasangan nato. Kung kinsa pa katong nagpalambo sa kinaiyahan, mao pa hinuon ang nasunugan. Usahay dili masabtan ang dagan sa kalibotan.

Si Ma'am Joyce nga naglikay sa mga pagkaong mantikaon, paggawas sa laboratory result, adunay "fatty liver," samtang katong kusog mangngasay ug mohabhab og humba, way deperensya ang atay, giatay!!!

Dili ba, walay kasegurohan ang tanang butang dinhi sa Earth, higala. Karon kamo pang duha sa imong uyab o asawa, hinaut nga inig Valentines... walay mausab o madugang sa inyong relasyon kay mora og aprobado na ang "Divorce Bill," igsuon. Sa Kanta ug drama na lang kaha nato masaksihan ang mga tawong nakabaton og, "forever?"

Seriously, ayaw ugati ang unsay anaa kanimo karon kay basig unya o ugma... kuhaon kini sa imong mga palad, igsuon. si Kobe gani nga sikat, datu ug healthy kaunonon na sa mga wate, kita pa kaha?

Ang nakanindot lang tingali sa atong kinabuhi kung ang atong "response" o "tubag" sa mga sitwasyon ang igong "pagpangandam," igsuon. Able o kaya nato kini kung ang atong panghunahuna natukod sa kamatuoran sama sanatala sa Bibliya, higala nga ang tanan mahanaw man apan ang pulong sa Diyos magpabilin busa, basa gayud kita'g Bible, mga darling kay mao ra kini ang adunay giya ug garantiya sa padulngan sa mga kalag ta.

Kadaghanan man gud sa mga tawo karon nahimong materialistic, kanang padatu ug pabongga ang tinguha, mao nagaapil sa mga kalihokan nga madoble, triple o napulo ka-pilo ang salapi. Nakadungog ko nga naay nagsugod na pod og investment scheme sa GenSan. Hala sa mga hangul sa kwarta, pagpailad na pod mo didto. Unya kung mapalpak, ang gobyerno inyong basulon bisan kamo ray nagbuotbuot og invest!!!

Sa pagtapos, walay ni usa ka butang nga imong gipanag-iyahan karon madala nimo sa imong lubnganan. Unaha tingalig pagpangita sa makahatag sa atong kalag ug kaluwasan aron malangit kitang tanan. Sa langit, ang atong tamakanan, bulawan, dili na magkasakit o madunot atong kalawasan, ug ang Diyos na ang makauban sa walay katapusan. Unsa may imong unahon karong pangandaman? Mahimo kitang "respons-able," kahigalaan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph