BISAN sa hulga sa 2019 new coronavirus acute respiratory disease (2019-nCoV ARD), gipahibaw ni Gobernador Gwendolyn Garcia nga padayon ang pagpahigayon sa Suroy-Suroy Sugbo sa Abril 25-26, 2020 sa isla sa Camotes.
Mao kini ang gipahibawo ni Garcia sa mga mayor atol sa iyang gipatawag nga tigom niadtong Huwebes, Pebrero 6, 2020.
Matod ni Garcia nga may mga protocol ug guidelines nga ipatuman ang lalawigan atol sa kalihukan aron masiguro nga luwas ang mga partisipante sa maong sakit sanglit may mga kauban kini nga mga turista.
“We will continue with the Suroy-Suroy sa Sugbo. Of course, we will put in place all the precautionary measures to ensure the safety of our tourists”, matod ni Garcia gahapon.
Dugang ni Garcia nga kon naa pa ang 2019-nCoV nianang buwana, magpadayon usab ang pagpakatap sa impormasyon kabahin sa paghinlo ug pag-atiman sa kaugalingon aron malikayan ang virus.
“Sa tanan nga mga Filipino nga moabot, duna na tay quarantine period and we shall continue to disseminate information on personal hygiene how to prevent this”, matod ni Garcia.
Subay niini, gipahibawo ni Maria Lester Ybañez, provincial tourism officer (PTO), nga nagpadayon sila pagdawat og reservations alang sa kalihukan.
Sa uwahing kalihukan sa Suroy-Suroy Northern Escapade, moabot og 305 ang mga partisipante. Gilauman ni Ybañez nga makaabot sila og di mo menos 200 ka mga partisipante bisan kon kuti ang proseso sa mga dokumento tungod kay molabang kini og dagat.
Gilaraw ni Ybañez nga kutob Abril 15, 2020 na lang ang pagdawat niini og mga partisipante nga buot mosalmot sa kalihukan.