GIBASURA sa Commission on Elections (Comelec) Second Division ang election protest ni kanhi Lapu-Lapu city mayor ug kanhi congressman Arturo “Boy” Radaza batok kang Lapu-Lapu City Mayor Junard “Ahong” Chan.
Si Radaza gipildi ni Chan pagka mayor sa dakbayan niadtong 2019 nga piniliay pinaagi sa dul-an 20,000 ka mga botos.
Base dokumentong gipirmahan sa mga commissioner nga sila si Luie Tito Guia, Socorro Inting ug Antonio Kho Jr. niadtong Mayo 24, 2019, si Radaza nisang-at sa iyang election protest batok kang Chan base sa alegasyon sa iyang kampo nga adunay nahitabong anomaliya ug iregularidad sa 2019 elections.
Nisang-at siya og annulment of proclamation batok kang Chan sa alegasyon nga atol sa adlaw sa election, adunay daghang sayop sa pag-ihap ug pag-scan sa mga Vote and Counting Machine (VCM).
Aduna usay giingong nigawas sa resibo sa mga botante nga mga ngalan sa kandidatong wa nila gibotaran. Ingon man ang pagbotar, matod pa, sa mga botante ni Radaza, apan Chan ang nigawas sa resibo.
Aduna usay botante nga giingong ningbotar kang Radaza, apan gibutangan og undervote ang iyang resibo sa mayor.
Apan sa tubag ni Chan niadtong July 10, 2019, gihimug-atan niini nga angay ibasura ang petisyon ni Radaza sanglit kuwang kini sa mga rekisitos ubos sa Section 7 ug section 9 Rule VI sa Comelec Resolution No. 8804.
Kini gumikan kay ang Professional Tax Receipt sa legal counsel ni Radaza di updated.
Wa usab, matod pa, makatumbok ang kampo ni Radaza kon pila ang mga presinto nga ilang giprotestahan ug pila usab ang mga botos niini.
Wa usab makapakita ang kampo ni Radaza sa detalyadong mga sayop ug irregularities sa mga presintong ilang gikwestyon.
“Based inthe foregoing, the Commission (Second Division) then finds the Protest to be insufficient in form and content for the failure of Protestant (Radaza) to indicate therein a detailed specification of the acts, or ommisions complained of showing the electoral frauds, anomalies, or irregularities in the protested precincts, as required by Section 7 (g), Rule 6 of Comelec Resolution No. 8804,” nagkanayon ang hukom. (GCM)