DUL-AN sa 270 na ka mga sakyanan ang na-clamp sa Cebu City Traffic Office (CCTO) sukad sila nagbalik na og pang-clamp, sigon ni Alma Barandog Casimero, department head.
Dungag niya nga nagsugod sila ug pang-clamp og balik sa mga sakyanan niadtong Enero 25, 2020. Ang pang-clamp ilang gihimo sa lainlaing bahin sa Siyudad sa sugbo. Kasagaran sa mga madakpan mao ang nag double-parking, ni-park sa anaay karatola nga no parking, wala nituman sa no stopping ug mga ni-park sa mga sidewalk.
Matod pa ni Casimero nga daghan sila og madakpan sa Fuente Osmeña ilabi na katong mga nag overnight parking.
Ingon usab niya nga ang no clamping gi-extend ni Cebu City Mayor Edgardo Labella ngadto na sa pagkahuman sa seremonyas sa Hubo ni Senior Santo Niño.
Niadto ra unta kini kutob sa Enero 19, 2020 sa gabii, human sa Sinulog grand parade.
Nimando si Labella niadtong Enero 14, 2020 nga ipahunong usa ang pag-clamp sa mga sakyanan apil napud ang libreng parking alang sa mga deboto ug motorista nga moapil sa novena alang sa kapistahan ni Senior Santo Niño.
Ang multa sa clamping nagkantidad og P500, dungagan pa sa kalapasan sa ordinansa nga anaa sa P1,000 ngadto sa P1,500 ang multa. Sa 270 ka mga sakyanan, 85 porsyento na niini ang nakabayad. Tulo ka mga heavy equipment nga giparada daplin sa karsada giapil og dakop sa CCTO atol sa ilang road clearing sa Pebrero 7.
Ang grupo ni Casimero, naka-tow og 36 sa sityo Maracas sa Barangay Lahug, J. Alcantara street ug sa barangay Quiot ug ang mga heavy equipment nga giparada sa dalan F. Sotto, dapit sa pier area. Laing 12 ka mga sakyanan ang na-clamp sa lugar.
Si Lyntoni Sable, administrative officer sa CCTO, nagkanayon ang maong mga heavy equipment nga gigamit sa pag-aspalto gibilin daplin sa karsada. (JCT, PAC)