ATONG nasayran nga linibo nga katawhan ang nangasalaag gikan sa ilang mga balay nga anaa sulod sa 14-kilometer zone sa Taal Volcano.
Kadaghanan kanila anaa sa mga evacuation center ug nagasalig nga masustentuhan sa atong gobyerno ug sa uban pang mga private organizations.
Kadaghanan pud kanila anaa na sa ilang mga kapamilya sa laing mga dapit.
Apan kasagaran kanila nagahandum nga makabalik na sa ilang mga balay diha sa Taal proximity.
Samtang tinuod nga wala nay laing dapit nga mas nindot pa sa imong balay, unsa man ang mahitabo kanimo kung ang imong nindot nga balay mao’y makahatag kanimo og peligro?
Samtang ang bulkan karon sige pa og alburoto, ang kinabuhi sa mga gusto mobalik didto anaa sa dakong delikado.
Dinhi nahimutang ang trabaho sa anaa sa otoridad, mga higala. Ang Phivolcs ug uban pa nga mga ahensya sa disasters and calamities gihatagan sa gobyerno og katungdanan aron mahilayo sa peligro ang kinabuhi sa katawhang Filipino.
Sa ilang pagsusi sa sitwasyon, ilang nakita nga hilabihan ka delikado ang pagbisita karon sa Taal. Busa, dili gayud nila pasudlon ang mga lumulupyo nianang lugara.
Akong nahinumdoman ang istorya ni Haring Ahab ug Haring Josapat sa Biblia (1 Kings 22). Nakig-gyera ang Judah ug Israel batok sa mga Syrianhon, apan ilang gikuha ang giya sa Ginoo pinaagi sa mga Propeta.
Si Propeta Micaiah, mao’y nagsulti kanila nga dili sila magdayon og pakig-gubat tungod kay mapilde sila. Apan wala nituo si Haring Ahab. Busa, bisan pa wala siya nagsul-ob og harianong biste, napatay gayud siya sa giyera.
Ako nagatuo nga aduna’y kaalam sa pagsunod sa mando sa mga anaa sa otoridad. Kini tungod kay gihatagan sila sa Ginoo og katungdanan sa pag-atiman o pag-amping sa katawhan.
Una niini gisulti sa Phivolcs nga ang puti nga aso gikan sa bulkan nagpasabot nga ang magma nga haduol na sa baba’ sa bulkan. Bisan og unsang orasa mahimong mubuto si Taal.
Apan daghan pa gayud nga katawhan ang naga-insister nga mobalik sa ilang mga balay dapit sa Taal tungod sa ilang mga mananap ug uban pang mga butang. Ako nagalaum nga paminawon unta nila ang mando sa atong otoridad alang-alang sa ilang kaluwasan.
Sa ingani nga mga sitwasyon, ang mando sa atong mga otoridad mao’y bidlisiw sa paglaum nga mahilayo kita sa kasablagan. Tungod nila, maluwas kita sa mga kalamidad nga mahimong makakitil sa atong kinabuhi.
Adunay mga panahon nga kinahanglan pud nato tan-awon kung sakto ba ang mga kasugoan nga ilang ginapatuman, apan sa mga sitwasyon nga kinabuhi nato ang anaa sa delikado, sundon gayud nato ang mando sa atong mga otoridad.