STA. CRUZ, Davao del Sur -- Napamatud-an sa kapulisan sa lungsod nga dili tinuod ang nabaniog nga sigben diin nag-viral sa social media.
Gibutyag ni Captain Mary Grace Martinez, hepe sa Sta. Cruz Municipal Police Station, nga ilang gihinabi ang biktima nga nailhang si Jenrel Bungan, 26, dunay kapuyo didto sa Sitio Cogon, Barangay Tuban.
Giasoy sa biktima nga migawas niadtong higayona ang iyang kapuyo aron sutaon ang paghilak sa ilang mga binuhing itoy ug didto nakita nga gipaak kini sa usa ka iro.
Human sa insidente, gitawag dayon sa kapuyo si Jenrel mao nga iyang gisundan ang iro kon hain kini padung.
Apan abtik nga miatubang ang iro kang Jenrel ug gidumog siya niini mao nga napaakan siya sa liog human iyang gisuklan ang mananap mao nga nidagan kini palayo sa lugar.
Human sa insidente, si Jenrel midason sa kapulisan nga abtik siyang nibalik sa ilang balay aron mangayo og tabang.
Nasayran nga usa ka ordinaryong iro lamang ang nipaak kang Jenrel human nakit-an pa kini sa tag-iya sa balay nga si Pacita ug sa mismong kapuyo niini.
Gilayon sab nagpatabang ang biktima sa 39th Infantry Battalion aron siya matambalan.
Sa pagkasunod adlaw, midangop si Jenrel sa usa ka albularyo alang sa binisaya nga pagpatambal apan gisultihan siya niini nga sigben ang nipaak kaniya hinungdan nabaniog kini sa ilang lugar.
Aminado sab ang biktima ug iyang kapuyo nga iro gyud ang nipaak kaniya.
"Walay angay nga ikabalaka ang mga katawhan sa Sta. Cruz kay ang nikatap sa Facebook nga sigben walay kamatuoran, usa lamang kini ka iro," panapos ni Martinez.