GIHANGOP sa Sugboanong higante nga si JuneMar Fajardo ang positibo nga panglantaw samtang nagpaalim siya sa usa ka grabeng angol nga iyang nasinati.
Nabali ang tuo nga tiil sa pambatong sentro sa San Miguel Beermen atol sa ensayo sa team niadtong Pebrero 3, 2020.
Gituohan nga dili makaduwa ang produkto sa University of Cebu (UC) Webmasters sa umaabot nga Philippine Cup sa Philippine Basketball Association (PBA) ug posible sa tibuok season.
Sa labing unang higayon gikan sa iyang pagkaangol, ang five-time PBA MVP nagpagawas og pamahayag pinaagi sa iyang instagram account nga saginghilaw15 kabahin sa nahitabo kaniya.
Ang pamahayag sa lumad nga taga lungsod sa Pinamungajan, Cebu adunay kauban nga hulagway sa iyang tiil nga nabali nga giputos og bandage.
“I already know what giving up feels like but I want to see what happens if I don’t! It’s just a minor setback! God has a better plan. I’ll be right back,” mensahe ni Fajardo.
Ang Beermen nangandam na’g insakto nga mokampanya sila sa Philippine Cup nga wala ang ilang labing sinaligan sa ilawom.
Ning maong komperensya, tinguha sa Beermen nga malangkat ang ikaunom nilang sunodsunod nga All-Filipino title.
Si Fajardo gilaumang modaog sa iyang ikaunom nga sunodsunod nga MVP title human niya napangulohan ang Beermen sa duha ka mga titulo sa miaging season.
Ibutyag ang modaog sa MVP sa miaging season karong Marso 1, 2020 atol sa pagsugod sa Philippine Cup sa Smart Araneta Coliseum.
“I have so many people to thank but I can’t name you all. I’ll include you in my prayers! I appreciate all your support, love, and prayers,” dugang mensahe ni Fajardo.
Sa pagpadaplin ni Fajardo, gilauman nga maapektuhan og dako ang kampanya sa Beermen apan wala kini nagpasabot nga wala na sila'y ikabuga.
Kon kuliton og maayo, ang Beermen aduna pa'y saktong mga hinagiban nga puwedeng makatapak sa haw-ang nga nabiyaan ni Fajardo. (ESL)