Binasi sa Isaias 58:7-10; Salmo 112; 1 Taga-Corinto 2:1-5; Mateo 5:13-16
POPULAR na ang panultihon “amping ug ampo” nga gipasiugda sa usa ka pari. Ang “amping” nagpasabot nga aduna kitay gahom. Gihatagan kita og panghunahuna sa Ginoo ug mahimo kitang batid sa pagbuhat sa lainlaing butang. Ang “ampo” nagpasabot nga bisag unsa nato ka maantigo, dili ta ang nagdumala sa atong kinabuhi. Ang Dios ang nagdumala sa tanan ug sa kasaysayan sa tawo. Maayo ni natong hinumdoman samtang giatubang nato ang hulga sa 2019 n-Corona virus.
Gipahinumdoman kita sa mga batid sa medisina ug sa mga awtoridad nga kanunay manghunaw. Likayan lang kon mahimo ang panon sa katawhan ug ang pagbesobeso. Bisan sa simbahan, ang pangalawat diha lang usa sa kamot. Mao kini ang “amping”. Binasi kini sa atong nahibaloan, sa pagkakaron, sa kinaiya sa maong sakit. Niadtong Miyerkules sa gabii, nagprosesyon ang mga parokyano sa San Roque sa Mambaling aron pangayuon ang tabang sa ilang patron. Mao kini ang “ampo”. Gikinahanglan ang amping ug ampo.
Niadtong milabay nga siglo may mga peste sa cholera ug ang gitawag nga “Spanish flu” diin nakabaton og panalipod ang mga lumulupyo sa Mambaling tungod sa ilang pagprosesyon sa larawan ni San Roque.
“Ipadan-ag ang inyong kahayag atubangan sa mga tawo, aron makita nila ang inyong mga maayong buhat ug himayaon nila ang inyong Amahan nga anaa sa langit,” miingon si Jesus. Iyang gitandi man god ang kinabuhi sa tumutuo sa pagdagkot og suga nga dili ibutang sa ilalom sa sudlanan apan ibutang ibabaw sa tungtunganan sa suga aron madan-agan ang tanan. Sa panahon sa krisis, pareha karon, gitawag ang mga Kristohanon sa pagpadayag sa ilang pagtuo.
Gihisgotan ni Isaias ang pipila ka pamaagi diin mapadayag ang kahayag sa mga tumutuo. Mao kini ang mga espirituhanong buhat sa kaluoy sama sa pagpakaon sa mga gigutom. Kinahanglan ubanan pod kini sa kinabuhing ligdong nga dili mobuhat og bakak nga akusasyon. Niining paagiha modan-ag ang kinabuhi sa tumutuo ngadto sa uban. Diha sa pagtabang sa mga nanginahanglan makita nato ang tawhanong gahom nga makabuhat og maayo.
Usahay sayop ang atong pagsabot sa kahayag nga atong ipadan-ag. Mao nga miingon si San Pablo sa iyang unang sulat sa mga taga-Corinto nga miadto siya kanila “dili pinaagi sa mga halangdon nga mga pulong o sa kinaadman...kondili diha ni Jesucristo, ug siya nga gilansang”. Nag-agad ang pagtuo sa mga taga-Corinto sa “gahom sa Dios”.
Naglangkob ang gipanghisgotan ni Isaias ug ni Pablo ang tawag sa pag-amping ug pag-ampo.
Nag-amping ug nag-ampo ba kita?