NAMATAY ang Insek nga doctor nga unang nitaho kabahin sa novel coronavirus sa miaging Disyembre 30 dayon gidakop kay kuno nag-rumor mongering. Natakdan ang 34 anyos nga doctor samtang nag-ateman og pasyente nga natakboyan sab.
Kining maong hitabo nakapasamot sa kalibotanong kahadlok kabahin sa paspas nga pagtakod sa maong kagaw sa tibuok kalibotan ug sa nagkadaghan nga nangamatay.
Kining kamatayon sa doctor dili fake news sama anang gipakatap nga tsismis sa Facebook nga ang tag-iya sa usa ka dakong department store niadto kuno sa Wuhan, China ug natakdan usab.
Naglibog lang ko nganong mahadlok mopalit sa tindahan nga di man magpakita ang tag-iya kon tinuod man. Basin dunay Insek kwakang nga nagtulo ang laway no? Hahaha!
Apan tinuod nga angayang unahon nga magbantay kita sa atong panglawas kay sa kaayohan sa China nga maoy nabalak-an sa atong kagamhanan.
Nag-Google sab ko karon lang kon duna bay declaration of emergency o calamity nga na-isyu ang Department of Health (DOH) aron mas sayon mamalit og supplies isip pangandam.
Ang akong nakit-an lang nga ang Lalawigan sa Sugbo ubos na karon sa State of Preparedness. Naa say state of calamity sa General Santos City. Nahibulong ko nganong walay nasudnong deklarasyon o bisan mga color code alang sa mga hospital.
Nangutana ko kay nabalaka kabahin sa procurement procedures sa kagamhanan. Kanus-a pa kaha makapalit og dugang supply kon moagi pag bidding ug uban pang red tape?
Ang ako lang nabalak-an karon kay daw walay koordinasyon ang DOH ug ang Land Transportation Franchising Regulatory Board (LTFRB).
Samtang wala moinsister ang DOH nga gikinahanglan gyud ang medical masks, nag-una-una na ang LTFRB sa paghimog lagda nga gikinahanglang magmaskara ang mga drayber sa public utility vehicles. Moabot ra ba og P5,000 ang multa.
Dayon, nagsugod na sa pagpanakop ang mga hanggaw nga LTFRB personnel dinhi sa Sugbo.
Hoy, mga amaw, asa man ang supply karon sa maskara nga halos tanang mga botika duna may anunsyo nga wala nay supply niini? Mosugot mo nga magtaptap lang og nuog o labakara ang mga drayber? Pangwarta ra man kining pagpanakop sa LTFRB.
Ang mahinugdanon karon mao ang pagsiguro sa personal hygiene labi na ang pagpanghunaw. Dayon, kon dunay sip-on, ubhon ug hilanat, mas maayong mobisita dayon sa doktor bisan lang sa barangay clinic.
Uso ra ba gyud karon ang ordinaryong ubo. Mas maayo nga masiguro dayon kita nga dunay corona o wala ba kining atong baga. Haha!
Kon ma-diagnose nga positibo sa novel coronavirus, mas maayong naa ug maateman kita sulod sa hospital. (@anol_cebu sa Twitter)