KITANG mga Filipino mga sugarol. Dili lang sa sugal, kon dili sa pagpanimpalad. Hinoon, kining kinabuhi sugal man kini. Kay wala man kitay kasayuran kon unsa ang mahitabo kanato sa umaabot nga mga adlaw. Kon sa iningles pa ‘risk taker’ ta. Kana bang bisan namiligro ang atong kinabuhi andam kita nga mosungasong sa bul-og sa mga hagit ug pagsuway. Bisan sa kahait sa labaha ato gihapon nga hawiran aron lang mabuhi.
Kining pag-adto sa gawas sa nasud labi pa ang atong mga Overseas Filipino Workers (OFW) nga atong gitawag nga modern heroes pagpanimpalad pod ni. Ang atong mga OFW wala masayod kon unsa ang ilang dangatan didto sa laing nasud nga diin sila manarbaho. Misungasong lang sila kay aron makakuwarta aron mabuhi ang ilang pamilya bisan kon namiligro ang ilang mga kinabuhi sa mga nasud nga ilang trabahoan.
Karon daghang mga nasud sa Middle East ang nagkagubot, apan aduna gihapoy manimpalad nga moadto aron manarbaho. Ang uban giabusuhan sa ilang employers. Samtang ang uban madunggan na lang nato nga gipamatay sa ilang mga amo.
Sama aning mga OFW nga atoa manarbaho sa Hong Kong o ubang bahin sa China nga gihugpaan karon aning gikalisangan ug gikahadlukan nga 2019 novel coronavirus acute respiratory disease (2019-nCoV ARD). Nanguli sila niadtong Christmas holidays ug gusto na untang mobalik bisan sa pagbuto aning coronavirus. Apan gidid-an sila sa atong kagamhanan gumikan sa maong balatian. Apan ang uban namugos nga mobalik na kay gipangita na sila sa ilang mga employers.
Sus, unsa man diay ang ilang palabihon? Ang makakuwarta kay dako og suweldo didto o ang ilang panglawas. Namahawa naman gani ang ubang mga lumolupyo sa maong mga lugar aron di matakdan niining balatian unya ang ato na hinuong kababayan ang mobalik didto. Kon simbako matakbuyan sila niining maong matang sa sakit, unsa man ang mahitabo nila didt? Ang ilang kitaon igo ra nga igasto sa pagpa-hospital. Maayo kon ma-hospital pa. Kon mamatay sila? Magpabilin lang usa god ta dinhi total temporaryo ra man kini. Inig lurang aning tanan,mobalik na sa normal ang atong kinabuhi. (bobbygnalzaro@gmail.com)