UPAT ang nasikop sa Minglanilla Police Station human nasakpan nga nag-pot session sa sports complex, duha kanila mga menor de edad pa niadtong Biyernes sa gabii, Pebrero 7.
Matod sa Minglanilla Police nga nakadawat sila og report gikan sa concerned citizen kalabot sa lantarang gihimo sa upat sa Minglanilla sports complex.
Dali kini nga girespondehan sa kapulisan hinungdan sa ilang pagkasikop.
Ang duha ka mga menor de edad, mga tinun-an pa sa grade 4 ug grade 5, nagpangidaron og 15 anyos ug 17 anyos.
Ang laing duha ka dinakpan giila nga sila Ashely Gerali, 20, taga sitio Lower Pakigne, Minglanilla; ug Christopher Fuebla, 19, residente sa Barangay Pasil, Siyudad sa Sugbo.
Sa pakisusi, giingon nga nag-tripping ang upat nga diha sa sports complex magsuyopog shabu. (FMD)