USA ka dakong hagit ang pagkatudlo sa pagka direktor Police Regional Office 7 alang kang Police Brigadier General Albert Ignatius Ferro.
Si Ferro, kinsa nangulo sa anti drug campaign sa kapulisan ug nakadakop kang Kerwin Espinosa, maoy gitudlo ni Philippine National Police Archie Francisco Gamboa.
Kay ang illegal drugs usa sa dakong problema sa Central Visayas, matod ni Ferro nga ang iyang pagka pangulo sa sa PNP Anti Illegal Drug Group sa Camp Crame dako og matabang.
Apan iyang giangkon nga ang problema sa illegal nga drugas sa Central Visayas di masulbad kon way abag sa publiko.
Adunay ipatuman nga programa si General Ferro nga iyang ipahibawo sa iyang mga sakop.
Ang ilang target mao ang demand reduction sa supply sa illegal nga drugas.
Nakita usab niya ang panginahanglang edukaron ang kabatan-unan labot sa kadaot sa paggamit sa illegal nga drugas.
“Aside from intelligence-driven operation against illegal drugs, we will also have more activities on demand reduction which is educating the youth,” matod ni Ferro.
Usa sa programa nga iyang ipatuman mao ang READY nga nagpasabot nga resistance, education against drug for the youth.
Ubos sa READY program, adunay ipanghatag nga module sa mga grade 1 nga tinun-an hangtod sa grade 12 nga mahimong masabtan sa mga batan-on.
Matod ni Ferro nga wa siya magtuo nga sa rehiyon 7 siya ibutang ni General Gamboa tungod kay ang una niyang nasayran adto siya sa Dakbayan sa Davao idestino. (AYB)