SI JUSTICE Secretary Menardo Guevarra niawhag sa Kagamhanan sa Dakbayan sa Talisay sa pagduso ngadto kaniya o ngadto sa National Bureau of Investigation (NBI) sa taho sa giingong nagpakatap og fake news kalabot sa 2019 novel coronavirus acute respiratory disease (2019-nCoV ARD) sa siyudad.
“It’s much better if they report, coming from Talisay (City) will be submitted to my office or directly to the NBI so that alam ng mga NBI kung saan sila mag-iinvestigate,” matod ni Guevarra sa Sabado, Pebrero 8, 2020.
Kini human giingong usa ka Jewel Louie Aviso, kinsa nangangkong tipik sa Talisay Rescue Team, giingong nipakatap pinaagi sa social media nga dunay mga tawo nga positibo sa 2019-nCoV ARD nga na-admit sa Talisay District Hospital.
Si Guevarra niingon nga kon dunay kamatuoran nga malisyusong tumong sa pagpakatap sa di maong impormasyon, ang mao nga tawo kinahanglan pasakaan og tukmang kaso sa korte.
Ang Department of Justice (DOJ) nimando sa NBI sa pag-imbestigar ug pagpasaka og mga kaso kon gikinahanglan batok niadtong mopakatap og fake news kalabot sa 2019-nCoV ARD.
Sa usa ka mando sa Martes, si Guevarra nimando kang NBI Director Dante Gierran sa pag-imbestigar ug pagpahigayon og case build up sa “alleged deliberate spread of misinformation and fake news about the 2019-nCoV ARD and false reporting of 2019-nCoV cases.”
“This is very serious. Kaya po nag utos ako sa NBI ay dahil nakaka distract yan eh sa government effort para maayos yung problema natin to overcome the coronavirus, the new one,” siya nagkanayon.
Si Guevarra didto sa Talisay City sa Sabado, Pebrero 8, 2020 aron pagtambong sa Menardo Guevarra Cup Visayas Leg sa Talisay City.
Sa laing interview, si Talisay City Mayor Gerald Anthony “Samsam” Gullas Jr. nisulti sa SunStar Cebu nga ang pagpanginlabot sa NBI makatabang nga di mokatap ang fake news, labina sa 2019-nCoV ARD.
“I just told him (Guevarra) I agreed with him that we must do something about fake news spreading of 2019 NCoV-ARD cause that happened here in Talisay,” sulti ni Gullas sa SunStar Cebu.
Sayo ning semanaha, ang Talisay City officials ug mga awtoridad nangita sa usa ka Jewel Louie Aviso.
Sa iyang post, si Aviso niingon nga ang district hospital naa sa “red alert” kay usa sa mga pasyente positibo sa coronavirus ug laing pasyente gi-admit sa Talisay District Hospital alang sa testing.
Sa usa ka pamahayag, si Gullas nimando gilayon sa mga pulis ug City Legal Office sa pagpangita kang Aviso.
Pipila ka oras human sa pamahayag ni Gullas, si Aviso nangayog pasaylo sa iyang FB post ngadto sa mayor ug sa publiko.
“To all Talisaynons nga nabalaka sa akung post ganina, mangayo lang kog pasaylo ninyo kai na bag-ohan lang ko sa akung nakita ganina nga nag-prepare ang Talisay District Hospital ganina para sa coronavirus. Wala koy intention nga ma-panic ang mga tao sa akong gipost kaganiha kay gusto lang ko makatabang, pero sayop man diay ang information. Usbon ko nga mangayo jud kog pasaylo ninyo tanan nga naka-cause kog panic. Daghang salamat,” matod ni Aviso sa iyang post sa FB. (WBS, JKV)