MOABOT ngadto sa 313 ka mga adunay nagkalain-laing kasupakan sa balaod ang nasikop sa mga police station sa Police Regional Office Northern Mindanao (PRO-10) sulod lamang niadtong Enero 27 ngadto Enero 30 ning tuig.
Gipahibalo ni Police Brigadier General Rolando B. Anduyan, Regional Director nga kini nga accomplishments sa rehiyon pinaagi sa ilang programa nga Simultaneous Aggressive Police Operations (SAPO).
Sulod sa tulo ka adlaw mitala ang rehiyon og 313 ka mga indiwidwal nga nagbaton og nagkalain-laing kasupakan kung diin sa maong gidaghanon moabot ngadto sa 112 ang arestado gumikan sa kalambigitan sa ginadili nga druga; 14 nadakpan nga most wanted person; 168 ang wanted persons , 19 sa illegal gambling ug 27 ka mga armas ang nakumpiska ug gisurender.
Nagtala sab ang rehiyon ug pag-pang-rescue sa mga minor de edad atol sa pag implementar sa Laws and Local ordinances sama sa 193 ang gidakop human nga nasapon nag inom sa mga pampublikong lugar, 13 nadakpan sa kasupakan sa smoking ordinance, 31 arestado sa nga naghukas-hukas diha sa publiko ug 185 ka mga minor de edad ang nakasupak sa oras sa curfew.
Tinguha karon sa kapolisan nga magpokos sa seguridad ug kaluwasan sa komunidad pinaagi sa agresibong pag implementar sa mga balaudnon sa ilang tagsa tagsa ka lugar aron mapugngan pa ang posibleng krimen nga matigayon ug kini makab-ot lamang kung anaa sab ang kanunay nga kooperasyon sa katawhan o komunidad.