BOLUNTARYONG mitahan sa kapulisan ang usa ka lalaki nga suspetsado sa pagpangluba patay sa iyang kainom niadtong Pebrero 5, 2020 mga alas 10:00 sa buntag diha sa Sitio Danao, Purok 4, Brgy Libertad, Gingoog City.
Sa imbestigasyon sa Gingoog City Police Station sa pagpanguna ni Police Lt. Colonel Ariel Phillip Pontillas nasuta nga ang biktima mao si Jonathan Anlanggoy, 23, ang gireport nga nakabsan sa kinabuhi sulod sa Misamis Oriental Provincial Hospital sa Gingoog City human giluba sa kainom niining giilang si Ronnie C. Bagtong, 27, residente sa susamang dapit.
Nasuta nga silingan kining duha ug nag-inom niadtong tungora apan dihang lango na sa ilimnong makahubog ang duha nagkalalis nga misangpot sa pagpangluba. Giingong tungod sa kaulit ni Bagtong nahinaykan niini og dunggab ang biktima makaduha ka higayon hinugdan sa kamatayon niini.
Ang City Disaster Risk Reduction Management Center maoy unang nakaresponde ug midala sa biktima sa naasoyng tambalanan apan gideklarar nga dead on arrival sa doktor.
Buntag na sa Pebrero 6, 2020 boluntaryong mitahan ang suspetsado didto sa atubangan ni PS/Sg. Ronaldo Erojo sa Purok 2, Catuan, Baragay Lunao, susamang siyudad.
Ang suspetsado nagtingkagol na karon sa prisuhan kinsa gitakdang mag-atubang og kasong murder.