SUPERBALITA DAVAO

Binakbakay sa militar ug BIFF niulbo; kampo nailog

(Gipaambit nga hulagway)

PIKIT, North Cotabato - Nakugang ang mga sibilyan sa subling paglusad og air-to-ground assault sa militar alas 6:15 sa buntag niadtong Sabado, Pebrero 8.

Sumala ni 602nd Brigade Chief, Brigadier General Robert Capulong nga milusad sila og focused military operation batok sa grupo nila Kumander Katato ug Daurin Manampan sa Bangsamoro Islamic Freedom Fighters (BIFF) didto sa Sitio Blah, Brgy. Manaulanan sa lungsod.

Apan pasulod pa lang ang puwersa sa 7th Infantry Battalion, Philippine Army nga gipangulohan ni Lieutenant Colonel Niel Roldan, uban ang mga sakop sa 62nd Division Reconnaissance Company (DRC), gipabuthan na sila sa BIFF.

Daling nakaabag ang Philippine Air Force ug gibombahan ang gilubluban sa mga kaaway nga milungtad og usa ka oras ug tunga ang binakbakay una miatras ang BIFF pasulod sa Liguasan Delta, ilabi na nga nagpungasi na ang bomba gikan sa duha ka MG-520 attack helicopters.

Walay naangol o napatay sa mga sundalo apan gikompirma sa mga sibilyan nga upat ang napatay ug dunay mga samaron sa mga sakop ni Katato ilawom sa grupo ni Shiek Esmail Abdulmalik alyas Kumander Abu Toraife sa BIFF-ISIS Inspired Group.

Narekober sa mga sundalo sa kampo sa BIFF ang mga nahibilin nga sinina, mga bala, materyales ug dokumento sa paghimo og bomba.

Samtang nagpasalamat si Roldan sa tabang ug kooperasyon sa Moro Islamic Liberation Front (MILF) sa operasyon sa militar batok sa mga BIFF. (Edgar E. Fuerzas)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph