TUMANG kadismaya sa mga investors sa Rigen Marketing dihang gipaboran sa korte nga makapiyansa sa kasong syndicated estafa ang CEO niini nga si King Paul Auditor ug lain pang mga kaubanan niini nga naduhig sa investment scheme.
Sabado sa hapon, Pebrero 8, sulod mismo sa compound sa Davao del Norte Provincial Jail sanglit, walay mga court personnel ug wala matud pa kini naka-schedule. Giingong nag-walk out ang government prosecutors sa Tagum City sa pagpanguna ni City Prosecutor Noel Palma tungod sa ilang kadismaya ug gitawag nga "highly irregular" ang gipahigayong pagdungog.
Nadismaya ang 44-anyos nga online seller nga si Joshua Geronio dihang iyang nasayran subay sa unod sa Joint Order sa korte nga mi-file of Affidavit of Loss and Waiver of Rights si King Paul Auditor kinsa nagpasabot nga nawala ang iyang tanang bank pass book ug dili na maukay pa ang iyang bank accounts human gi-ransak ang iyang balay sa Tagum City.
"Kana kay maka-piyansa na siya, tapos gideklara niya pinaagi sa Affidavit of Loss and Waiver of Rights, wala na gyod ang kuwarta, pakyas ang giingong refund sa Rigen," ingon ni Geronio.
Giingon nga gitugtan sa korte nga makapiyansa si Auditor subay sa gipagula nga kamandoan ni Tagum City Regional Trial Court Branch 1 Judge Virginia Tejano-Ang.
Sa dugang report, duna sab kuno'y gipahigayong pagdungog niadtong Pebrero 4, apan wala nakadawat og imbitasyon ang piskalya.
Si Candelaria Magsinoc, 60-anyos, nagpadayag sa iyang kasubo sa hitabo, tungod daw mawad-an og hustisya ang ilang pagkabiktima.
"Bisan unta og wala na na-refund among kuwarta, hustisya na unta to nga napriso siya ug ang iyang mga kauban. Pero karon, wala nay hustisya, kay nakapiyansa man," masulob-on nga pagsaysay ni Magsinoc.
Ang college student nga si Kyle Jumao-as, 19, dili kalimot sa iyang naagian, dihang iya suma pa unta nga pambayad sa tuition ang kuwarta nga iyang giapil sa Rigen Marketing.
"Di gyod ko kalimot sa akong P15,000 nga pambayad unta sa tuition nako sa school, di na man gyud to mauli, molayas naman ning si Auditor labi na karon kay nakapiyansa," niya pa.
Bisan pa man sa hitabo, daghan gihapon ang nagmalaumon nga mga investors nga mabalik ang ilang mga kapital, apan mas daghan suma pa ang nawad-an na og paglaum.