Sugilanon: Panamilit kang Manoy Israel

FELIXBERTO A. ESCLAMADO, JR.

Saac II, Mactan, Lapu-Lapu City, Cebu

TISOY, wala na si Papa Israel. Mao pay pagka human sa katapusang pangadye sa ika-40 nga adlaw sukad sa iyang pagtaliwan,” maoy sugat nga mga pulong ni Ellaine kanako dihang nahiabot ko sa ilang balay aron mamisita kang Manoy Israel niadtong higayuna.

Si Ellaine kamanghurang anak nga babaye ni Manoy Israel Ybañez, suod kong higala. Magsusulat siya ug ang iyang ngalan kanunay mabasa sa inilang mga mantalaan sa katitikang Bisaya, sama sa Superbalita Cebu. May mga sinuwat sab siyang mga artikulo ug gumalaysay nga nangapatik sa Bisaya Magasin. Usa sa iyang mga sugilanon mao ang ‘Kamang sa Su’m’ nga unang napatik sa Superbalita. Naghatag kinig dungog kang Manoy Israel kay gisalmot niya sa bangga sa sugilanon sa Bathalad Mindanao ug maoy midaog sa unang ganti. Gipatik sab sa Bisaya Magasin ang maong mananaog nga sugilanon. Gimatuod niya sa maong sugilanon ang kalantip sa iyang hunahuna ug dagang.

Si Manoy Israel nga naila sa iyang angga nga Rael, usa ka ligdong ug mapahiubsanon nga tawo.

Nahinumdom ko nga niadtong Oktubre 30, 2019, sa alas 6:50 sa gabii nahiabot ko sa panimalay ni Manoy Israel. Gikan pa ko niadto sa akong gitrabahoan nga nahimutang sa dalan P. del Rosario, duol sa University of San Carlos. Nabatasan man god nako nga bisitahon siya katulo sa usa ka tuig didto sa ilang sityo Mayupay, Brgy. Quiot, Cebu City. Matag duaw ko kaniya magdala kog gasa nga kinaham niya, hinog nga mga mangga. Tinuod kaming managhigala. Gani, giisip ko siyang sama sa usa ka tinuod nga amahan. Matag higayon nga moduaw ko kaniya, mamatikdan nako nga may mga luha nga molugok sa iyang mga mata. Buot ko untang mangutana kaniya kon unsay iyang gihilakan, apan gipugngan ko lang akong kaugalingon. Nagtuo ko nga gikalipay niya pag-ayo ang pagbisita ko kaniya. Nalipay usab si Ellaine sa akong pagbisita kang papa niya.

“Tisoy, salamat kaayo sa imong pagbisita kang Papa Rael!,” moingon si Ellaine usa ka higayon niana. “Way sapayan, Llaine,” tubag ko.

Wala ko malimot nga kaniadto si Manoy Israel maoy nagdasig ug nag-aghat nako sa pagsuwat og sugilanon para sa Superbalita Cebu, ang nag-unang tabloid nga Binisaya sa lalawigan sa Sugbo ug sa silingang mga probinsiya sa Bohol, Negros Or. ug Leyte. Nagkaila kami si Manoy Israel pinaagi sa Bisaya Magasin diin magpadala kog mga komento sa kolum nga ‘Super React’ diin nakita niya ang numero sa akong selpon. Tungod niini daghan ang akong nahigala, lakip na ang pipila ka mga magsusulat.

Dihay mga higayon nga manuroy kami si Manoy Israel sa mga balay sa laing mga magsusulat. May mga higayon sab nga mohapit siya sa akong gitrabahoan.

Apan wala nako damha nga sa katapusan kong pagduaw sa ilang balay niadtong gabii sa Oktubre 30, 2019, nga ‘tua na diay siya’ sumala sa gitug-an ni Ellaine kanako. Nakurat ko. Matod niya, mitaliwan si Manoy Israel sa bulan sa Septiyembre, 2019 (nalimot ko sa petsa). Naguol ako kay giisip ko man siya nga sama sa tinuod nga amahan. “Wa man ko nimo pahibaw-a, Llaine.” matod ko kang Ellaine.

“Nagtuo man god ko nga gipahibawo ka sa mga kauban mong magsusulat,” ni Ellaine.

“Way nagpahibawo nako, Llaine,” tubag ko. “Mao bitaw nga dia ko aron duawon siya ug kumustahon.” Milingkod ko sa makadiyot ug gisud-ong ang hulagway ni Manoy Israel nga diha sa ibabaw sa usa ka lamesita.

“Tisoy, pasensiya gyud kaayo,” matod ni Ellaine.

“Okey lang, Llaine. Dili man kita makabuot sa Ginuo!” matod ko, dayong pananghid nga molakaw na. Mipauli ko nga huyhoy ang mga abaga kay wala nako makita si Manoy Israel nga buhi pa. (KATAPUSAN)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph