NINGPATIGBABAW sila si Ariel Saballa ug May Salimbangon sa 4th University of Southern Philippines Foundation (USPF) Fun Run kagahapon sa USPF Lahug campus ning dakbayan.
Si Saballa maoy naghari sa men’s 12K division diin miabot siya sulod sa 43 ka mga minutos ug 26 ka mga segundos diin nabiyaan niya og 31 ka mga segundos ang nagsunod kaniya nga si Ryan King Salinay.
Niangkon sa ikatulong dapit mao si Marvin Kevin Revilla, kinsa mirehistro og 45:06.
Sa iyang bahin, si Salimbangon maoy midaog sa women’s 12K pinaagi sa oras nga 1:09:49.
Ang magsuon nga sila si Louie ug Ella Villacin maoy nagsunod kang Salimbangon. Si Louie mitali og 1:11:03 samtang si Ella mirehistro og 1:12:44.
Si Narwin Lucaylucay maoy midaog sa men’s 6K division pinaagi sa oras nga 20:11 samtang si national junior triathlete Karen Manayon maoy milampos sa women’s 6K pinaagi sa oras nga 24:10.
Sa men’s 3K division, si Eduardo Nelmida maoy midaog pinaagi sa oras nga 9:26 samtang si Geneciel Bravo maoy mipatigbabaw sa women’s 3K pinaagi sa oras nga 11:47.
Ang lumba gipasiugdahan sa USPF Alumni Association Inc. alang sa benepisyo sa scholars ug mga atleta sa tunghaan. (RSC, ESL)