MAS pilion sa import sa Ateneo Blue Eagles nga si Ange Kouame ang makaduwa sa Gilas Pilipinas kumpara sa iyaha mismong nasod nga Ivory Coast.
Si Kouame daan nang mipahibawo nga interesado siyang morepresentar sa Pilipinas kon madayon ang naturalization process alang kaniya.
Sa miaging buwan, si Samahang Basketbol ng Pilipinas (SBP) vice-chairman ug Antipolo first district representative Robbie Puno mi-file na sa House Bill No. 5951 nga nagtinguha nga mahatagan og Filipino citizenship si Kouame.
“Yeah, I think it’s underway. I think it will happen,” matod sa 20 anyos nga basketbolista.
Si Kouame, kinsa adunay 6’10” nga gitas-on, naa sa nasod niadto pang 2016 diin nagtungha kini og high school sa Multiple Intelligence International School sa Katipunan una kini mitapon sa Ateneo.
Sa miaging season sa UAAP, naagak ni Koaume ang Blue Eagles sa perpektong 16-0 nga rekord lahos na ngadto sa kampiyunato pinaagi sa iyang averages nga 12.5 puntos, 11.8 rebounds, 2.9 blocks, ug 1.4 assists.
Gipasabot ni Kouame nga interesado na sab unta ang Ivory Coast nga mokuha kaniya apan iyang giklaro nga ipalabi niya ang pagduwa sa Gilas Pilipinas hilabi na kay gitugtan na siya sa iyang pamilya. (ESL)