IMPRESIBO og gipakita si Andrew Wiggins sa labing una niyang pagduwa sa hosts Golden State Warriors apan nausik ang tanan niyang paningkamot gumikan kay napilde sila sa Los Angeles Lakers, 120-125, kagahapon sa National Basketball Association (NBA).
Si Wiggins, kinsa nakuha sa Warriors gikan sa Minnesota Timberwolves baylo nila ni D’Angelo Russell, Jacob Evans III ug Omari Spellman sa wala pa ang trade deadline niadtong Biyernes, nagpakatap dayon og 24 puntos sa labing una niyang pagduwa sa kanhi 5-time champions.
Gumikan kay bag-o pa lang gyud siya sa sistema sa Warriors, gimanduan ni coach Steve Kerr si Wiggins nga moduwa lang sa iyang naandan nga duwa ug tuod man, mao kini ang gibuhat sa kanhi No.1 overall pick.
“I told him, ‘No matter what happens we need you to sprint the floor, both ways,’” matod ni Kerr.
Apan ang maayong gipakitang duwa ni Wiggins gialkontra sa duha ka mga lider sa Lakers nga sila si Anthony Davis ug kanhi four-time MVP LeBron James.
Nimugna si Davis og 27 puntos ug 10 rebounds samtang nitampo si James og 22 puntos, 11 assists ug walo ka rebounds aron pangulohan ang Lakers apan nagkinahanglan sila’g dakong suporta gikan sa ilang mga kauban aron mapukan ang bag-o og pamay-on nga Warriors.
Napilde na man sab tuod ang Warriors apan aduna na’y nakita nga kahayag si Kerr sa paghiabot ni Wiggins hilabi na inig balik puhon sa nangaangol niyang Splash Brothers nga sila si Klay Thompson ug Stephen Curry.
Nasayod si Wiggins kon unsa ka dako ang iyang obligasyon hilabi na ning panahuna nga kuwang og dagkong mga haligi ang bag-o niyang team. “I was like if it happens it happens, it’s going to be a blessing either way,” matod ni Wiggins. “..This whole thing didn’t really feel real until they announced my name.”
Sa kadaugan, napahugtan sa Lakers ang ilang paggunit sa liderato sa Western Conference dala ang 39-12 nga rekord samtang ning-unlod og samot ang Warriors sa labing ulahing puwesto ning maong tapok bitbit ang 12-41 nga rekord. (AP, ESL)