ANG atensiyon sa katawhan nakatutok karon sa makalisang nga 2019 novel corona virus (2019-nCoV) nga unang gitaho didto sa Wuhan, mainland China ug ning atong pagsulat nikalas sa labing minos 813 ka mga kinabuhi, sumala sa cnn.com.
Ang 813 nga nangamatay tungod sa 2019-nCoV naglakip sa 811 didto sa mainland China ug tagsa sa Hong Kong ug sa Pilipinas. Ang namatay dinhi sa Pilipinas usa ka Chinese national gikan sa Wuhan, China. Wa pay Pilipino nga namatay niini.
Mikabat na sa kapin sa 37,000 ang natakboyan sa maong virus sa tibuok kalibotan, kadaghanan didto sa mainland China. Mas daghan na ang nangamatay sa 2019-nCoV kay sa severe acute respiratory syndrome (SARS) nga nakapatay og 774 ka mga tawo sa tibuok kalibotan niadtong 2003.
***
Kon kusog ang pagkuyanap sa maong virus, mas kusog ang pagkatap sa fake news.
Ang World Health Organization (WHO), nga nagpadala og team sa China aron pag-imbestigar sa nCoV, niingon nga ang pagkatap sa fake news, sayop nga inpormasyon ug conspirary theories, nagpasamot sa kalisod sa pagkontrolar sa maong virus.
“At WHO, we’re not just battling the virus, we’re also battling the trolls and conspiracy theorists that push misinformation and undermine the outbreak response,” matod ni WHO director general Dr. Tedros Adhanom Ghebreyesus.
***
Dinhi sa ato, di usab angay nga hikalimtan ang makamatay nga sakit nga dengue fever nga gidala sa mga namok. Sa 286 ka mga tawo nga gitakboyan sa dengue sa siyudad sa Sugbo gikan sa Enero 1, 2020 hangtod sa Pebrero 1, 2020, duha na ang nangamatay.
Si Cebu City Health Officer Daisy Villa niingon nga samtang nikunhod ang mga kaso sa dengue, makaalarma ang pagkamatay sa duha ka pasyente nga naigo sa dengue fever gikan sa Barangay Taptap ug Inayawan.
Angay manglimpyo sa palibot, tabunan ang napundo ug lim-aw sa tubig.
Sagupon sa mga lokal nga kagamhanan ang paggamit sa larvicide sa pagpatay sa mga pito-pito ug nguyo-nguyo.