GAWAS sa gubat sa ilegal nga druga, ang pag-ugkat ni Presidente Rodrigo Duterte sa gamot-hinungdan sa walay puas nga problema sa supply sa tubig sa Metro Manila maoy ikaduha seguro sa labing importanteng isyu nga nahimo sa presidente nga dako'g epekto pag-ayo sa masa.
Dili tiaw, pila na ang nangaging presidente sa nasod ang wala makasusi sa kontrata tali sa kagamhanan ug mga higanteng pribadong kompaniya nga nag-supply og tubig sa kaulohan o kaha nagpababuta-bungol lang. Makapaduda nga dunay nabulahan sa korapsiyon taliwa sa pag-antos sa masa.
Mismo si Duterte miratsada sa pag-ingon nga ang tibuok kontrata sa pag-supply og tubig sa kaulohan, dokumento sa korapsiyon? Dayag nga kawat sa atubangan sa katawhan nga nag-ilaid pa sa tumang kalisod, dugang niya.
Niadtong Martes sa miaging semana, Pebrero 4, si Duterte nisulti nga ang orihinal nga kontrata tali sa Manila Water Company ug Maynilad Water Services Inc. nga “null and void” o nulo ug way bili tungod sa daghang probisyon nga nasupak sa balaud sa Pilipinas.
Mao kini hinungdan nga nimando siya sa pagtagik og bag-ong kontrata nga ‘patas’ ug makiangayon sa tanan. Dunay kasingkasing sa masa. Kini human nautingkay nga ang kontrata maoy tinubdan sa problema human ‘gituyo sa pagtago’ sa publiko. Way laing nakakomentaryo gawas sa pipila nga sulod sa kagamahan nga dakong posibilidad nga kakonsabo usab.
Kini nga kontrobersiya tukmang kapanaminan sa Metro Cebu Water District (MCWD) nga natay-og usab ning ulahi sa daghang isyu. Unsa kahay mga kasabotan sa MCWD? Nganong nabalikbalik usab ang problema sa tubig? Kinahanglang mapublikar aron malili sa tanan. Magbantay kita sa bag-ong mosud nga pamahimuslanon ubos sa bag-ong liderato.