UNOM ka mga tawo nga pinangita sa balaod ang nadakpan sa mga tinugyanan niadtong Sabado, Pebrero 8, sa managlahing dapit sa lalawigan, kinsa ang usa gikonsidera nga top 2 most wanted ug ang laing duha managsuon nga nadakpan.
ARGAO
Si PSsgt. Howard Maynopas, desk officer sa Argao Police Station, niila sa dinakpan nga si Arniel Datuin, 27, ug molupyo sa Sitio Katagbakan, Barangay Mabasa, Argao.
Matod ni Maynopas, ang ilang hepe nga si PMaj. Eldifonso Miranda Jr. maoy nangulo sa gihimong operasyon sa pagdakop kang Datuin.
Bitbit ang warrant of arrest nga maoy pruweba nga si Datuin gipangita sa tinugyanan aron pagtubag sa iyang sala nga giatubang.
Si Judge May Faith Tromata Rebotiaco sa Branch 26 RTC, Argao maoy niisyu sa warrant of arrest.
Apan ang dinakpan wala na mokomentaryo sa iyang habig sa krimen nga nahitabo niadtong Marso 1 sa miaging tuig.
Walay piyansa nga gitakda batok kang Datuin.
Dugang ni Maynopas nga miuban ra nga malinawon si Datuin dihang nasakpan na sa mga pulis.
Daanbantayan
Samtang, duha ang wala nakaikyas sa pagposas sa mga pulis human sila gipahibawo sa ilang mga giatubang nga sala.
Si Vivencio Yurag alyas “Jun Jun”, 21 , ug molupyo sa Barangay Malbago sa lungsod sa Daanbantayan.
Ang suspek nadakpan sa mga pulis sa Daanbantayan sa kaso nga Attempted Rape subay sa Republic Act 7610 o pagpanamastamas sa usa ka menor de edad.
Matod ni Patrolman Reynand Sitoy nga si Yurag nadakpan sa alas 10:20 sa buntag niadtong Sabado sa iyang pinuy-anan sa Sitio Badiang, Barangay Malbago, pinasikad sa warrant of arrest nga giisyu ni Judge Ceasar Madeja, Branch 18 sa RTC Bogo nga pinetsahan niadtong Enero 24, 2020.
Dunay girekomenda nga piyansa nga P120 mil sa iyang kagawasan.
BADIAN
Samtang, pagpanamastamas usab sa usa ka menor de edad nga kaso ang giatubang sa dugang nadakpan didto sa lungsod sa Badian.
Si PSsgt. Melvin Collados sa Badian Police niingon nga wala gyuy swerte si Ruben Suerte, 25, nga taga Barangay Lambug sa maong lungsod, human madakpi sa mga pulis pasado alas dos sa hapon niadtong Sabado.
Si Judge Bernardito Malabago sa Branch 16 sa lungsod sa Barili maoy mimando nga dakpon si Suerte, nga pinetsahan niadtong Nobiyembre 14 sa miaging tuig.
ASTURIAS
Ug ang katapusang duha nga nadakpan si Jenjen Ampoan, 35, ug molupyo sa Barangay Ampoan, ug taga Barangay New Bago, lungsod sa Asturias.
Kinsa nadakpan pasado alas 4:00 sa hapon sa kaso nga grave oral defamition.
Si Judge Mary Jocelyn Regencia sa MCTC sa lungsod sa Asturias maoy miisyu sa maong warrant of arrest ug dunay piyansa nga P18 mil.
Ug ang ikaunom nga dinakpan mao ang managsuon nga Jackie Malinao, 29, ug manghud niining si Albert, 26, ug pulos lumolupyo sa Barangay Candugay, lungsod sa Barili.
Kinsa ang duha nag-atubang og kasong direct assault upon an Agent of the person in authority nga giisyu ni Hon.Judge. Alberto Pita sa MTC sa lungsod sa Barili gipetsahan og Pebrero 4 ning tuiga. (BBT)