GISALIKWAY sa World Health Organization (WHO) Philippines ang tabitabi nga ang 2019 novel coronavirus acute respiratory disease (2019-nCoV ARD) dili mosanay sa init nga nasod.
Sumala niini, ang virus mabuhi sa bugnaw o bisan sa init nga klima.
Mao kini ang na-post sa WHO Philippines sa ilang official Facebook page.
Matod sa WHO, bisan ang pagsige og inom og tubig aron ma-hydrate kanunay, dili makapugong sa pagtakboy sa nCoV.
“While staying hydrated by drinking water is important, it does not prevent coronavirus infection,” dugang sa ilang post.
Samtang, aron pagtabang sa nasodnong kagamhanan sa quarantine centers alang sa people under monitoring (PUM) ug people under investigation (PUI), si Cebu City Mayor Edgardo Labella nitugot sa Department of Health (DOH) ug Bureau of Quarantine (BOQ) sa paggamit sa pacilidad sa Sitio Sudlon sa Barangay Lahug, siyudad sa Sugbo.
Matod ni Labella, kon dunay panginahanglan sa quarantine sa PUMs ug PUIs sa pasilidad bisan kini naa sa duol sa sentro sa dakbayan, dili siya magsapayan basta makatabang sa uban sa pagseguro sa kasilinganan.
"There is no problem for me, we will allow them,” matod ni Labella.
Sumala niya, ang dakbayan nakigsabotsabot sa sa tag-iya sa usa ka building sa siyudad nga magamit kon dunay dakong panginahanglan sa quarantine center sa PUIs.
Apan wala niya gibutyag kon asa kini nahimutang.
Dugang sa mayor, ang City Health Office (CHO), Quick Response Team ug ang City Disaster Risk Reduction and Management Council nag-assess na karon kon unsay buhaton sa building.
Sa samang kalamboan, mabutang sa alanganin ang usa ka sakop sa disaster team kon mahibaw-an man gani nga mag-post sa social media nga makahatag og alarma kabahin sa 2019-nCoV.
Si Harold Alcontin, ang pangu karon sa Cebu City Disaster Risk Reduction and Management Office nga nahinabi sa Superbalita Cebu, niingon nga naumol na ang Task Force nCoV sa Sugbo.
Ang tanan nga mga sakop sa disaster team, volunteer o dili, gidid-an sa pag-post sa social media bisan unsa bahin sa virus.
Kini nga pahimangno gipahibalo pag-usab ni Alcontin human sa pag-post sa usa ka kanhi sakop sa Talisay Disaster Rescue Team nga naghatag og kaalarma sa mga netizen.
Hinuon, nangayo na og pasaylo sa publiko pinaagi ra pud sa iyang Facebook account.
Dugang ni Alcontin nga ang tanan nga mga pangutana ug pagpahibawo usa ra ka tawo ang gihatagan og gahum sa pagtubag niini kondi ang pangulo lang sa CHO.
Gikalipay ni Alcontin nga ang tanan nga mga sakop niini nituman sa maong awhag ug tungod kay mga responsable kini kon ang kinabag-an ang hisgutan.
Awhag ni Capitol Site Barangay Councilor Kelly Quijada, pangulo sa fire volunteers, kinahanglan sundon ang panawagan sa mga hingtungdan aron dili kini makahatag og kabalaka. (RRM, JJL, BBT)