MIBUTYANG ang state weather bureau nga ang nasinati karon sa Sugbo nga katugnaw sa panahon ug kalat-kalat nga pag-uwan dala gihapon sa hanging Amihan kun ang northeast monsoon.
Si Engineer Al Quiblat, ang Visayas bureau chief sa Philippine Atmospheric, Geophysical and Astronomical Services Administration (Pagasa), niingon nga makasinati ngadto sa undang-undang nga pag-uwan ang tibuok Sugbo base sa ilang weather forecast.
"Light to moderate and occasional rain base sa atong weather forecast," sigon ni Quiblat.
Dugang niya nga sa Martes, Pebrero 11, 2020 makasinati na ang tibuok Kabisay-an og mas maayo nga panahon intandi sa mga niaging mga adlaw.
Gidahom nga mahuman ang cold season sa Amihan sa kinatapusang semana sa Pebrero ngadto sa unang semana sa Marso. (JCT)