SUPERBALITA DAVAO

Roldan: Balik sa Banika

Nota Bene

SA KAPASPAS sa panahon karon, dili na nato mahibal-an kung sakto pa ba ang atong gipangbuhat. Go lang ng go basta alang sa kalamboan sa pamilya. Apan moabot ang panahon nga medyo kapoy na og makahinuktok kita kung unsa pay wala nato makab-ot o may natampo ba kita sa katilingban o sa kalibutan nga atong gikamat-an?

Mao kini ang gibati sa mga "ex-development workers," o kadtong mga tawo nga nagtrabaho sa pribado, relihiyusong grupo o sa gobyerno alang sa mga kabus, dinaugdaug, ug gipanglutos sa sistema sa katilingban.

Kadaghanan kanila nagtrabaho nga boluntaryo sa mga kabus nga sektor, sama sa gagmay'ng mag-uuma, mananagat, mamumuo, kababayen-an, kabatan-onan, kabataan, kabus sa lungsod ug siyudad, mga propesyonal ug uban pa.

Gawas sa pagpataas sa kahimatngon sa katawhan kabahin sa mga isyu sa katilingban ug sa tawhanong katungod, gipataas usab nila ang ilang kahanas ug kahibalo aron mahimong produktibong sakop sa katilingban sama sa bag-ong paagi sa panguma, pagnegosyo, paggama og mga produkto gikan sa hilaw nga materyales sa palibot ug uban pa.

Busa imbis nga mopahulay og motan-aw na lang sa panghitabo sa palibot, naka-desider ang pipila kanila nga motukod og usa ka kalihukan nga modani sa uban pang retirado og mga batan-on nga mobalik ngadto sa yuta.

Gitawag kini og "Balik sa Banika Movement." Puwede sab kining tawagon og Balik sa Yuta, Balik sa Kinaiyahan, Balik sa Kalibutan, Balik sa Panguma," basta ang katuyuan mao nga motikad ug magtanom sa yuta aron makatabang sa dakong hadla sa kalibutan karon nga gitawag og "climate crisis."

Usa ka panagtigom ang gipahigayon niadtong Enero 25 ubos sa panawagan sa Worldwide Filipino Alliance-Pangdaigdigang Alyansa ng Pilipino Inc. (WFA-Papi). Usa kini ka boluntaryong kapunongan sa mga Pinoy nga namuyo na sa langyaw'ng nasud ug mga Pinoy dinhi sa Pilipinas nga buot motampo sa kalambuan sa nasud sa bisan unsang malinawong paagi.

Usa sa hinanaling proyekto nga buot buhaton sa Balik sa Banika mao ang pagtikad sa 6-ka ektaryang luna nga nahisakop sa UP-Mindanao reservation area didto sa Marilog. Plano niini nga himuong "herb and food production basket" ang maong luna pinaagi sa boluntaryong serbisyo sa matag myembro ug mga kaalyado niini.

Buot magtanom og kahoy, lagutmon, utanon, ug prutas didtong dapita gamit ang inatong paagi sa panguma ug paggamit og "organic fertilizers." Mikusog karon ang "organic movement" sa Davao og matag semana, adunay pagpamaligya og "organic products" haduol sa Sangguniang Panlungsod building.

Sa kaulahian, damgo sa grupo nga mahimo usab kining sentro sa "cultural and ecological tourism" sa Davao City ilabi na gayod nga gipalibutan ang maong lugar sa mga lumadnong komunidad.

Daghang grupo nga interesado nga makigduyog niini gawas sa mga "development workers" sama sa Gabay sa Pagbabago, sa plano niini nga magtukod og "agricultural school" kauban ang Department of Agriculture, Tesda, Department of Trade and Industry og uban pa.

Alang sa mga sama kanamo nga mga hamtong ug dunay dako nga panahon sa kaugalingon nga moapil sa Balik sa Banika pinaagi sa pag-Like sa FB account o kaha pagtanom og misitas sa inyong tugkaran.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph