'Araw' wa nay kisaw

Hulagway kuha ni Macky Lim
Hulagway kuha ni Macky Lim

GIKANSELAR sa lokal nga kagamhanan sa siyudad sa Davao ang mga dagkong kalingawan alang sa ika-83rd Araw ng Dabaw aron pugngan ang posibleng pagkatap unya sa 2019 novel coronavirus (2019-nCoV).

Gipahibawo ni Mayor Sara Duterte-Carpio sa press conference kagahapon, Lunes, ang kanselasyon sa Pasiugdang Pagsaulog, Reyna Dabawenya, Ginoong Davao, Sayaw Pinoy, Kalingawan sa Sta. Ana, Hudyaka, Mutya ng Dabaw, Pasidungog, Araw ng Empleyado, Kanta Dabawenyo, Parada Dabawenyo, ug Datu Bago Awards.

Iya hinuong giklaro nga way kompirmadong mga kaso sa sakit sa siyudad apan ang mga pasilidad sa panglawas sa Davao dunay limitasyon sa pagdiparal sa 2019-nCoV acute respiratory disease (ARD) nga mga pasyente kon duna may outbreak.

"Wala tay confirmed case sa Davao City but ang atoang problem is in case nga daghan ang magkasakit, dunay mga limitations ang atong mga hospital. Dili ta makaaccommodate og hundreds and thousands of people getting sick," pagklaro sa mayor.

Matud niya nga ang Misa Pasalamat lang sa Marso 1 ang madayon. Apan ang pista opisyal (holidays) sa Marso 1 ug Marso 16 di mausab.

Gisulti ni Duterte-Carpio nga tanang mga preparasyon alang sa Araw ng Dabaw mahitabo sa 2021 na.

Mga hingtungdan sa turismo nagsuporta sa desisyon sa mayor sa siyudad.

"We respect the basis of her decision because I know, hers is more of a preventive so we have to make some proactive steps," matud ni Davao Tourism Association (Data) president Gatchi Gatchalian sa paghinabi kaniya pinaagi sa telepono sa SunStar Davao.

Matud niya nga ang kanselasyon sa kalihukan sa Araw ng Dabaw mohatag og impak sa industriya sa turismo sa dakbayan apan gamay lang gawas lang kon sa Kadayawan.

"I will not see the impact to be as big as if it was Kadayawan. Good thing Kadayawan is by August pa. I am sure by that time meron ng probably some steps to prevent the virus [sa pagkatap]," pung pa niya.

"Ang Araw ng Dabaw naman is really for the Dabawenyos. It is a charter day. [It is] not more of a major crowd or tourist drawer for them to really go to the city," dugang pa niya.

Apan kon ang mga turista makadesisyon nga mosalmot sa selebrasyon, apil sa mga sektor nga makaapektuhan mao ang akomodasyon, tour agencies, pagkaon, ug pasalubong shops.

Alang sa mga pribadong kalihukan, gikanayon ni Duterte-Carpio di siya makapugos sa pagkanselar o idasig basta lang mga tigpasiugda mosunod sa mga sumbanan nga gitakda sa Department of Health (DOH) memorandum order 2020-57 alang sa mga hotel ug sa samang mga establisemento.

Apan mga ginikanan sa mosalmot alang sa Hudyaka 2020 nag-apelar sa mayor nga isibog lang ang pagtakda ug di ikanselar ang mga kalihukan.

Si Erick Marquez, usa sa mga ginikanan kinsa dunay anak sa Magallanes Elementary School, nagsulti nga mga tinun-an nakagahin na og panahon nga magpraktis ug nakagasto na sa ilang mga uniporme.

Matud niya nga kasagaran sa mosalmot nga mga tinun-an mograduwar karong tuiga ug di na makagamit sa uniporme nga alang unta sa Hudyaka 2020.

Matud niya nga samang insidente ang nahitabo sa kasaulogan sa Pasko Fiesta nga gikanselar niadtong Disyembre sa niaging tuig.

"Naluoy pod mi sa among bata. Pagkabalo nila nga ingon ana ang mahitabo, nanghinayang sila. Nadismaya gyud sila," tug-an niya.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph