HEPE sa Police Regional Office 7 nilagda og kasabutan uban sa iyang mga police official nga di modawat og payola gikan sa illegal gambling, illegal nga drugas ug uban pang illegal nga kalihukan.
Nangulo ang bag-ong milingkod nga PRO-7 director, Police Brigadier General Albert Ignatius Ferro, uban sa iyang mga staff ug deputies.
Matod ni Ferro nga pagpakita kini sa publiko ilabi na sa mga taga Central Visayas nga sila seryuso sila sa ilang trabaho.
Kinsa kadtong mamatud-an nga sad-an iyang parelibohan sa katungdanan ug ipaubos sa imbestigasyon.
“Kami po kasama ko ang aking command group at ang ating buong pwersa, mga chief of police, provincial directors ay nakiki-isa sa kampanya ng ating mahal na chief PNP sa no take policy,” matod ni Ferro.
Sama sa iyang gibutyag sa miaging semana, iyang ipatuman ang 3-strike policy sa iyang mga provincial ug city police office directors nga kon adunay tulo ka chief of police nga marelibuhan sa katungdanan, matangtang usab sila.
Usa sa iyang tan-awon kon ang illegal nga sugal ug drugas sa ilang lugar naghitak sa usa ka dapit nga way gihimong aksyon, ang iyang mga sakop ipaubos dayon sa imbestigasyon ug parelibohan sa katungdanan.
Dunay maniid
Adunay gitahasan si Ferro nga magbantay kanila nga maoy mohatag kaniyag report labot sa pagdawat og payola sa maong mga chief of police gikan sa illegal gambling.
Gitinguha niya nga malimpyohan gikan sa mga kawatan ang hut-ong sa PRO7.
Human sa gihimong pinirmahay, nimando gilayon si Ferro sa iyang mga sakop sa paglusad og operation lukop rehiyon batok sa illegal gambling nga wa hatagig pagtugot sa Philippine Charity Sweepstakes Office (PCSO).
Nabantayan sa PRO 7 nga nibalik na usab ang operation sa illegal numbers game bisan sa ilang sub-sub nga kampanya sa nanglabay nga mga semana.
Upat
Samtang gi kompermar ni Ferro nga sa 350 ka pulis nga gipa recall ni PNP Chief Archie Gamboa, upat niini gikan sa Central Visayas ug niadtong miaging semana milarga na kini sa kaulohan.
Wa nganli sa heneral ang upat tungod kay ang chief pnp na ang mopahibawo sa publiko ko kinsa.
Gipasabot niya nga ang tumong ug tuyo sa pag recall sa maong mga police personnel aron mapaubos na sa due process sa ilang mga kaso human gilakip sa listahan ni Presidente Rodrigo Duterte nga nalambigit sa illegal nga drugas.
Kon mamatud-an nga sila sad-an kay nagdawatan o nagnegusyo sa illegal nga drugas, sila tangtangon sa serbisyo ug posibling pasakaan og kasong kriminal. Dugang ni nga sa dihang siya pa ang hepe sa anti illegal drugs unit sa Camp Crame daghan siyag na monitor nga mga pulis sa Central Visayas nga nalambigit sa illegal nga drugas ug illegal nga sugal.
Nagdawatan kini sa kita sa illegal nga drugas ug sugal hinungdan nga ning iyang paglingkod, iyang gi warningan nga di kini buhaton aron di mahisama sa mga kanhi pulis nga nadestino dinhi nga nag-atubang na hinuon og problema.