MAGKA-live-in partners nga tag-as nga opisyal sa komunistang grupo sa lalawigan sa Bohol ang nasikop sa hiniusang pwersa sa kapulisan sa Central Visayas ug militar niadtong Sabado, Pebrero 8, alas 5:30 sa kaadlawon sa Purok 7, Barangay Tulang, lungsod sa Getafe.
Ang mga nangadakpan giila nga silang Reynaldo Luega Camacho, 50, diin dunay upat ka mga alyas nga Baler, Chad, Jeboy ug Val Camacho.
Giila usab ang iyang kapuyo nga si Carmelita Geraldez Caneda, 48, alyas Mauren ug Inday.
Nadakpan sila pinasikad sa warrant of arrest nga giluwatan ni Suceso Arcamo sa RTC 7 branch 47 sa dakbayan sa Tagbilaran, Bohol sa kasong murder.
Ang maong kaso may kalabutan sa pag-ambush-patay ni 2nd Lieutenant Cue ug laing 12 pa ka mga sundalo sa lungsod sa Sagbayan niadtong 2000.
Gawas sa ilang posisyon sa New People's Army (NPA) nga mao ang tigkolekta og kuwarta sa mga negosyante ug dagkong kompanya sa Negros Oriental, giila usab sila sa kapulisan nga 'combatant ug hard core criminals.'
“Meaning to say that this hard core communist terrorist group, aside extorting money from the civilians, are also involved in other criminal terroristic activities like placing improvised explosive device for the troops,” matod ni Police Brigadier General Albert Ignatius Ferro, bag-ong direktor sa Police Regional Office (PRO) 7.
Dugang ni Ferro, sakop sila sa Komiting Rehiyonal Central Visayas, regional staff ug National Finance Commission Operations Group for Visayas sa NPA.
Atol sa pagdakop kanila, nakuhaan sila'g mga armas sama sa kalibre 45, 38 revolver, duha ka fragmentation hand grenades pineapple type ug mga nagkalainlaing explosive devices, explosive components ug ang subersibong dokumento.
Matod ni Police Colonel Jonathan Cabal, provincial director sa Bohol Provincial Police Office (BPPO), nga usa ka buwan nila nga gi-monitor uban sa Armadong Kusog sa Nasud ang duha human sila makadawat og impormasyon nga sakop sila sa walhong grupo.
Nagliho ang duha gawas sa probinsya sa Bohol ug gihimo lang nga bakasyonanan ang ilang panimay sa Getafe.
Gideklarar ang maong probinsya nga insurgency free na human nga wala nay armadong pakig bisug ang nasigpatan sa tibuok lalawigan.
Si Lieutenant Colonel Jerry Borja, ang Battalion Commander sa 47th Infantry Battalion nga nag base sa Carmen Bohol, nagkanayon nga ang kagamhanan sa lalawigan sa Bohol mideklarar nga persona non grata ang communist terrorist group niadtong Septembre sa miaging tuig.
Nakatabang usab, matod pa, ang publiko sa paghatag sa impormasyon labot sa ilang presensya sa lungsod sa Getafe nga nagpahibawo sa kapulisan ug kasundalohan.
Dekada 80 sila na-recruit sa NPA sa dihang nag tungha pa sila sa siyudad sa Sugbo ug sukad niadto wala na sila mobalik sa sabakan sa balaod ug padayon sa ilang pagpangilkil sa mga negosyante sa Negros Oriental.
Tungod sa ilang pagkasikop, nagtuo si Ferro nga napiangan na ang NPA Central Visayas tungod sa ilang finance officer. (AYB)